Rusiye işğal etken Qırımda qırımtatar tilini qullanuv imkânlarını eksiltüv siyaseti devam ete, bu yıl qırımtatar faalleri bu siyasetniñ daa sert olğanını qayd ete. Bu aqta Qırım.Aqiqatqa Qırımlı aq qorçalayıcılar bildirdi.
Onıñ aytqanına köre, qırımtatar kütleviy haber vastaları ve mekteplerinde ket-kete daa çoq rus tili yanğıray.
"Ne yazıq ki, biz qırımtatar tilli mekteplerde ögretüv formal ola – mında ket-kete daa çoq rus tili yanğıray. Akimiyet buña qoltuta, meselâ, kelecek sene Aqmescitteki Borçoqraq qasabasında qırımtatar tilli mektepniñ müdiri qırımtatar tilini bilmegen insan olacaq. Qırımtatar kütleviy haber vastalarında da vaziyet yahşı degil, meselâ, "Millet" telekanalında müdir vazifesi alındı, rus tilinde yayınlar daa çoq ola. Yerli müftilikniñ neşirleri bile qırımtatarcadan daa çoq rusça çıqa", – dep tarif etti adını gizli qaldırmaq şartınen aq qorçalayıcı.
Onıñ qayd etkenine köre, bu yıldan başlap qırımtatar tilinde kitaplarnıñ basılması pek eksildi.
"Evelleri Gasprinskiy Mediamerkezi er yıl 20 kitap bastırğan olsa, bu yıl maliye etilüvi dört qat eksildi, qırımtatar tilinde yazılğan bütün kitaplar ise eki tilde basılmalı", – dep haber etti aq qorçalayıcı.
Aq qorçalayıcı qayd etkenine köre, Rusiye akimiyetiniñ siyasetine qarşı Qırımda yaşağan qırımtatar cemaatı qırımtatar tilinde köntent yapqan milliy blogerlerni istey.
Rusiye akimiyeti bu vaziyetni izaatlamay. Rusiye kontrolindeki Qırım akimiyeti yarımadada resmiy şekilde üç devlet tili – rusça, ukrayince ve qırımtatarca bar, dep bildire. Ve bu tillerde tasil esnası temin etile, dep aytalar. Qırımda ukrayin ya da qırımtatar tilini qullanmağa yasaqlağan bir madde resmiy şekilde olmadı. Amma milliy azlıqlarnıñ ekseriyeti ana tilinde tasil alıp olamay.