Kyivde mayısnıñ 30-nda «Knıjkovıy Arsenal» («Kitap Arsenalı») XIII Halqara festivalinde Ukrayina PENi, The Ukrainians Media, Vivat neşriyatı ve ZMINA İnsan aqları merkeziniñ leyhası olğan ve Demokratiyağa qoltutuv milliy fondunıñ (NED) yardımınen kerçekleştirilgen «Qırımnıñ serbest sesleri» kitabı taqdim etildi.
Tedbirde jurnalist ve yazıcı Rustem Halilov, medeniy menecer Tetâna Teren, ZMINA talilcisi Nari Usenko ve apiske alınğan Qırım.Aqiqatnıñ serbest hadimi Vladislav Yesipenkonıñ ömür arqadaşı Yekaterina Yesipenko bar edi, merasimni jurnalist ve yazıcı Olesâ Yaremçuk alıp bardı.
Kitap Kremlniñ 16 qırımlı mabüsiniñ ikâyelerini tarif ete – mında jurnalist, faal, qırımtatar halqınıñ vekilleri bar, olar Rusiye işğaline tirengeni içün 7 yıldan 19 yılğa qadar apis cezalarını aldı. Aralarında Nariman Celâl, Vladislav Yesipenko, İrina Daniloviç, Remzi Bekirov, Amet Suleymanov ve digerleri bar. Cıyıntıqta kitap qaramanlarınıñ mektüp, künlik defterleri, mahkeme nutuqları bar.
«Qırımnıñ serbest sesleri» kitabınıñ qaramanlarından biri – Qırım.Aqiqatnıñ serbest hadimi Vladislav Yesipenko. O, 2021 senesi martnıñ 10-nda Rusiye mahsus hızmetleri tarafından apiske alındı. Rusiye akimiyeti onı patlayıcı cihaznı saqlağanında ve taşığanında qabaatladı, lâkin aq qorçalayıcılar davasınıñ siyasiy sebepleri bar, dep ayta. 2022 senesi Aqmescitteki mahkeme Yesipenkonı 6 yılğa azatlıqtan marum etti. Jurnalist FSB tarafından işkence ve basqı aqqında bildirdi.
Taqdim merasiminde çıqışta bulunğan Yekaterina Yesipenkonıñ qayd etkenine köre, 2022 senesinden başlap Ukrayina ve Rusiye arasında esirlerni deñişüv vaqtında tek 5%-ı adiy vatandaşlar edi.
«Men bu cenk vaqtında vatandaş esirleriniñ deñiştirilüvinen bağlı muzakerelernen bağlı unikal zorluqlarnı añlayım. 2022 senesinden başlap adiy vatandaşlar qurtarılğanlarnıñ umumiy sayısınıñ tek 5%-ını teşkil ete. Lâkin eminim ki, ilk nevbette işten çıqarmaq içün esas qaideler olmaq kerek. Bu büyük istilâdan evel tutulğan ağır hasta, qadın ve qartlar», – dep ayttı Yekaterina.
O, cemaat toqtamamalı ve Rusiye tutqan vatandaşlarnıñ azat etilmesine irişmeli, dep qayd etti.
«Men vatandaş cemiyeti, aq qorçalayıcılar, tuvğanları Ukrayina vatandaş esirleriniñ azat etilmesi içün daa ne yapmalı bilmeyim, amma bu yolda toqtamamaq kerek olğanını bilem. Biz olarnıñ ümüti, destegi olamız, ve azat etilecegine, bahtlı ömürlerine işançlarını coymamalarını isteyim».
«Qırımnıñ serbest sesleri» Ukrayina PENi ve ZMINA tarafından 2021 senesi başlatılğan #SolidarityWords kampaniyasınıñ devamı ola. O vaqıt Ukrayina yazıcı ve jurnalistleri işğal etilgen Qırımda apiske oğrağan zenaatdaşlarınıñ vekilleri oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
