Ukrayına prezidentiniñ Qırım Muhtar Cumhuriyetindeki temsilcilik saytında qırımlı siyasiy mabüsler tutulğan yerler ve adresleriniñ harita peyda oldı.
Temsilcilik bildirgenine köre, Rusiye halqara uquq normalarını bozıp, taqip etilgen qırımlılarnı öz toprağına avuştırğanı içün böyle harita ihtiyacı bar edi.
«Bu harita «Serbest Qırımğa mektüpler» teşebbüsi içün de alet ola, istegenler onı qullanıp, mektüp yollaycaq insan ve bulunğan yeri aqqında tafsilâtlı malümat ala bile», – dep aytıla haberde.
Haritanı mında körmek mümkün.
Fevralniñ 19-nda Ukrayınada «Serbest Qırımğa mektüpler» aktsiyası başladı. Teşebbüs ukrayınalılar ve diger memleketlerniñ sakinlerini Rusiye qanunsız tutqan qırımlı siyasiy mabüslerge mektüp yazmasına çağıra.
Aktsiya mayısnıñ 19-na qadar devam etecek. Maqsadı – Kremlniñ ukrayınalı reineleri aqqında hatırlatıp, olarğa qoltutqanını köstermek.
Ukrayına prezidentiniñ Qırım Muhtar Cumhuriyetindeki temsilcilik malümatına köre, 2024 senesi fevralniñ 19-nda Rusiye 208 qırımlı siyasiy mabüsni apiste tuta, 125-i qırımtatarı ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
