«Qırımlı musulmanlar davası» mabüsleriniñ soy-sopları Qırımdan Rusiyege üküm çıqarıluvına yiberilmedi. Rusiye uquq qoruyıcıları Keriç köpründe mabüslerniñ advokatlarını ve jurnalistlerni blok etti. Bu aqta «Qırım birdemligine» advokat Nazim Şeyhmambetov bildirdi.
O, advokatlar Rusiye uquq qoruyıcılarınıñ Keriç köpründe yapqanlarını şikâyet etmege planlaştıra, dep ayttı.
Advokat, Rusiye uquq qoruyıcıları Rostov-na-Donuğa üküm çıqarıluvına barmağa tırışqan onlarnen qırımtatarını Keriç köpründe tuttı, dep tarif etti. Rusiye polis hadimleri «baza çalışmay» dep, aydavcılarnıñ vesiqalarını aldı. «Qırımlı musulmanlar davası» mabüsleriniñ soy-sopları evge qayttı. Rusiye uquq qoruyıcıları bu sefer olarğa vesiqalarını qaytarırlar, dep ayttı.
Laf vatandaş jurnalisti Remzi Bekirov, aq qorçalayıcı Riza İzetov, faaller Farhod Bazarov, Şaban Umerov ve Raim Ayvazovğa çıqarılacaq üküm aqqında kete. O, martnıñ 10-nda saat 10:00-da çıqarılmalı.
Rusiye uquq qoruyıcıları Keriç köpründe olğanlar aqqında açıq bildirmey.
2021 senesi dekabr ayında Rostov-na-Donu Cenübiy okrugınıñ arbiy mahkemesi «qırımlı musulmanlar davasınıñ» mabüsleri Remzi Bekirov, Riza İzetov, Şaban Umerov, Farhad Bazarov ve Raim Ayvazovnıñ mahkeme tahqiqatını yekünledi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
