Yaqın 1-2 saat devamında ve noyabrniñ 29-nda Qırımda saniyede 30-35 metr suratnen qasırğa yeli olacaq. Bu aqta Qırımdaki Rusiye Fevqulâde vaziyetler nazirliginiñ idaresi haber ete.
«Ealiniñ ayatı ve sağlığı içün telüke bar, reklama levhaları, terek, yahşı qoyulmağan inşçaatlar tüşe bile ve elektrik telleri üzüle bile. Qara, Azaq deñizlerinde ve Keriç boğazında qaza oluv ihtimalı bar. İnsanlarnıñ yalı kenarında ve yalını pekitken inşaatlarda bulunması ayat içün telükelidir», – dep aytıla haberde.
Aqmescitte ve Aqmescit rayonınıñ üç köyünde yaramay ava sebebinden elektrikler söndürile. Qırım.Aqiqat mühbiri bildirgenine köre, Aqmescitte küçlü ruzgâr tereklerni yıqa, elektrik telleri üzüldi.
«Krımenergo» yaramay ava aqibetleri aqqında resmiy şekilde bildirmey.
Berilgen malümatqa köre, noyabrniñ 29-nda kündüz ve noyabrniñ 30-nda Aqmescitte cenübiy-ğarbiy yel şimaliy-ğarbiy yelge deñişip, saniyede 25 metr esecek. Salı künü küçlü yağanaqlar yağması tahmin etile.
Qırımda noyabrniñ 30-na qadar furtuna ihtarı ilân etildi. Aqyar qurtarıcıları da yaramay ava aqqında bildire.
Qırımda ilk qış künleri suvuq ve qarlı ava olacaq, dep tahmin etile.
