Rusiye akimiyetiniñ kontrolindeki Aqmescitteki Kiyev rayon mahkemesi aprelniñ 29-nda «Hizb ut-Tahrir davasınıñ» mabüsleri Ernest İbragimov ve Oleg Fedorovnıñ maşinalarını davada ola bilecek para cezalarını qarşılamaq içün almağa qarar berdi, dep haber ete «Qırım birdemligi» advokat Lilâ Gemeciniñ aytqanlarına esaslanıp.
«Prokuror Sergey Pakula tahqiqatçınıñ olarğa («Hizb ut-Tahrir» davasınıñ mabüslerine – QA) ait VAZ maşinalarınıñ tutıp alınması aqqında muracaatına qol tuttı, çünki mabüslerniñ Rusiye Ceza kodeksiniñ 205.5 maddesiniñ ekinci qısmında 500 000 rublege qadar para cezası berile bile», – dep aytıla «Qırım birdemligi».
Berilgen malümatqa köre, qadı Galina Hulapova tahqiqatçınıñ muracaatını qanaatlendirip, Rusiye Ceza kodeksi 115 maddesiniñ 1-inci qısmı («para cezasını qapatmaq içün tahqiqatçı tahqiqat organı reberi ya da soraştırıcı prokurornıñ razılığınen şübheliniñ mülki tevqif etile») esasında tevqif etmege izin berdi.
«İmaye tarafı itiraz bildirip, mabüslerniñ mülki ömür arqadaşlarınen beraber qazanıldı ve evlilikte alındı, dep qayd etti, amma mahkeme advokatnıñ delillerinen razı olmadı. Mahkeme oturışuvında Fedorov ve İbragimov yoq edi», – dep qoştı faaller.
Hatırlatamız, aprelniñ 13-nde Rusiye kontrolindeki Qırım mahkemesi «Hizb ut-Tahrir davasınıñ» mabüsleri Oleg Fedorov, Azamat Eyupov ve Ernest İbragimovnıñ apis cezasıны iyülniñ 15-ne qadar uzattı.
Daa evel belli olğanına köre, Qırımdaki mahkeme apiske alınğan faal ve iş adamı Oleg Fedorovnı mecburiy mahkeme-psihiatrik ekspertizasına yolladı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Apiske alınmazdan evel Lenur Seydametov qırımtatar siyasiy mabüslerine aş mallarını alıp yollağan edi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
