Rusiye kontrolindeki Jeleznodorojnıy rayon mahkemesi Kazim Ametovnıñ Aqmescit SİZOsındaki işkence şaraitleri aqqında vatandaş davası boyunca oturışuvında penitentsiar müessisege kelecek esnasqa qadar qalğan vesiqalarnı bermesini emir etti.
Bu aqta «Qırım birdemligi» cemaat teşebbüsi haber ete.
Qayd etilgenine köre, hastahanede yatqan Ametovnıñ sağlığınen bağlı uzun teneffüsten soñ dava arizası, hususan zarar körgen kişiniñ esaslanğan bozuvları tafsilâtlıca tedqiq etildi. Esnas koronavirus sıñırlavları sebebinden qapalı rejimde keçirildi. Bundan ğayrı, mahkeme Aqmescitniñ SİZO-1-ini daa taqdim etilmegen vesiqalarnı iyünniñ 18-nde olacaq nevbetteki oturışuvına ilâve etmege mecbur etti, aks alda dava olğan deliller esasında baqılacaq.
«Bu çeşit davalarda zarar körgen kişi bozuvlar aqqında aytsa, devlet organı bozuv olmağanını isbatlaycaq deliller bermeli. Aks alda mahkeme olar bar edi, dep sayacaq», — dep añlattı advokat Rustem Kâmilev.
Rusiye kontrolindeki Sudaq şeer mahkemesi 2021 senesi aprelniñ 12-nde «Veciye Kaşka davası» boyunca mahküm etilgen Kazim Ametovnıñ şartlı apis cezasını lâğu etti, mahkümiyetini bağışladı.
2020 senesi dekabrniñ 4-nde «Veciye Kaşka davasınıñ» 63 yaşında mabüsi Kazim Ametovnıñ evinde Rusiye quvetçileri tintüv keçirdi. İlk malümatqa köre, anda «tahqiqat tedbirleri» oldı. Qırımtatar milliy areketiniñ faali Nariman Celâl bildirgenine köre, FSB hadimleriniñ tintüvi Ametovnıñ oğlunen bağlı.
Oña efsane dey ediler. Veciye Kaşkasız üç yıl (fotoresimler)
Ametov, evlerinde keçirilgen tintüv tafsilâtları aqqında tarif etti.
Qırım Muhtar Cumhuriyeti ve Aqyar prokuraturası ve Qırım Muhtar Cumhuriyetiniñ Milliy politsiyası cinaiy tahqiqat başlattı.
«Veciye Kaşka davası»
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etüvde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olaraq belgilendi. Asan Çapuh 3,5 yıl şartlı apis cezasını aldı, 3 yıl sınav müddeti olaraq belgilendi.
Bekir Degermenci, Asan Çapuh, Kazim Ametov ve Ruslan Trubaç qabaatlarını tanımadı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
