Qırımda «terrorizmge çağırğanından» ve «patlayıcı maddelerni qanunsız azırlağanından» şübheli sayılğan ekinci kişi apiske alındı. Bu aqta Rusiye kontrolindeki Aqmescitniñ Kiyev rayon mahkemesiniñ saytında haber etile.
Tahqiqat versiyasına köre, tutulğan kişi İnternette «islâmcı halqara terror teşkilâtınıñ mefküresi ile aynı olğan mefküre propagandasınıñ til ve psihologik alâmetleri» olğan üç videonı ve içtimaiy ağdaki şahsiy saifesinde «İslâm devletine» kirgen «Ahrar aş-Şam» terror gruppirovkası reberiniñ resmini derc etti.
Bundan ğayrı, tutulğan kişi elektrik çeşitli patlayıcı cihaznı azırlağanında qabaatlandı. Şübheli yedi yılğa qadar azatlıqtan marum etile bile. O, 2021 senesi iyünniñ 8-ne qadar apiske alındı. Qarar istinaf esasında şikâyet etile bile.
Rusiye FSBsi tarafından «terrorizmge qol tutqanından» şübheli sayılıp tutulğan eki Qırım sakininden biri eki ayğa apiske alındı.
Aprelniñ 9-nda Rusiye FSBsi, Aqmescitniñ tasil müessisesinde terror ücümini azırlağan 1992 ve 1999 senesi doğma eki vatandaş tutulğanı aqqında bildirdi. FSB, cinaiy dava mabüsleriniñ adları ve soyadlarını aydınlatmay. Tutulğanlar ya da advokatlarınıñ açıq izaatları yoq.
FSB, cinaiy dava mabüsleriniñ adları ve soyadlarını aydınlatmay. Tutulğanlar ya da advokatlarınıñ açıq izaatları yoq. «Hayyat Tahrir aş-Şam» 2017 senesi yanvar ayında quruldı ve «Cebhat an-Nusra» aydutları tarafından idare etile. Teşkilâtqa tahminen 20 biñ aydut kire, olar Suriyeniñ İdlib şeerinde terror faaliyetinen oğraşa.
2020 senesi Rusiye Yuqarı mahkemesi Rusiye baş prokurorı İgor Krasnovnıñ davasını qanaatlendirip, «Hayyat Tahrir aş-Şamnı» terror teşkilâtı dep tanıdı.
