Rusiye FSBsi, Aqmescitniñ tasil müessisesinde terror ücümini azırlağan 1992 ve 1999 senesi doğma eki vatandaş tutulğanı aqqında bildirdi. Bu aqta TASS Rusiye FSBsiniñ Cemaat bağları merkezine esaslanıp haber ete.
«1992 ve 1999 seneleri doğma eki Rusiye vatandaşı tutuldı, olar Rusiyede yasaqlanğan «Hayyat Tahrir aş-Şam» halqara terror teşkilâtınıñ tarafdarları ola», – dep bildirdi FSB.
FSB malümatına köre, terakt kerçekleştirgen soñ olar esas Ukrainadan ve Türkiyeden Suriyege barıp, «halqara terror teşkilâtınıñ» saflarına kirmege planlaştırğan edi.
FSB, tutulğanlardan patlayıcı cihaz yapmaq içün parçalar ve patlayıcı maddeler alındı.
Rusiye Ceza kodeksiniñ 205.1 maddesiniñ 1.1 qısmı («Terror faaliyetine yardım etüv»), 205.2 maddesiniñ 2-nci qısmı («Terrorizm propagandası») ve 223.1 maddesiniñ 1-inci qısmına («Patlayıcı cihazdarnı qanunsız yapuv») istinaden cinaiy dava açıldı. Terror ücümine azırlıq aqqında dava açuv meselesi de baqıla.
FSB, cinaiy dava mabüsleriniñ adları ve soyadlarını aydınlatmay. Tutulğanlar ya da advokatlarınıñ açıq izaatları yoq. «Hayyat Tahrir aş-Şam» 2017 senesi yanvar ayında quruldı ve «Cebhat an-Nusra» aydutları tarafından idare etile. Teşkilâtqa tahminen 20 biñ aydut kire, olar Suriyeniñ İdlib şeerinde terror faaliyetinen oğraşa.
2020 senesi Rusiye Yuqarı mahkemesi Rusiye baş prokurorı İgor Krasnovnıñ davasını qanaatlendirip, «Hayyat Tahrir aş-Şamnı» terror teşkilâtı dep tanıdı.
