Eñ az 200 Ukrayına vatandaşı Qırımda sahte siyasiy davalarğa istinaden apishanede tutula, dep bildirdi «Qırım aq qorçalayıcı gruppasınıñ» idare reisi Olga Skripnik.
«Şimdi eñ az 200 vatandaş sahte siyasiy davalarda apiste yata. Bu insanlar tibbiy yardım almay. Çoqusı allarda işkencege oğray ve cezaları bitmeden azat etmege imkânları yoq», – dep qayd etti o, «Qırım» munaqaşa paneli vaqtında.
Aynı vaqıtta Skripnik apis cezasınıñ bitmesi bile azat etilüvni kefil etmey, ukrayınalı faal Oleg Prihodkonıñ vaziyetinde olğanı kibi.
Aq qorçalayıcınıñ aytqanına köre, işğalniñ on yılı devamında Qırım aq qorçalayıcı gruppası 1400 Ukrayına vatandaşı repressiyalardan zarar körgenini qayd etti.
«Siyasiy ve diniy sebepli taqipler aqqında aytıla. Umumen zarar körgenlerniñ sayısı daa çoq edi, çünki balalar, mülki alınğan insanlar bar», – dedi o.
Ukrayına prezidentiniñ Qırım Muhtar Cumhuriyetindeki temsilcilik malümatına köre, 2024 senesi fevralniñ 19-nda Rusiye 208 qırımlı siyasiy mabüsni apiste tuta, 125-i qırımtatarı ola.
Fevralniñ 19-nda Ukrayınada «Serbest Qırımğa mektüpler» aktsiyası başladı. Teşebbüs ukrayınalılar ve diger memleketlerniñ sakinlerini Rusiye qanunsız tutqan qırımlı siyasiy mabüslerge mektüp yazmasına çağıra.
Aktsiya mayısnıñ 19-na qadar devam etecek. Maqsadı – Kremlniñ ukrayınalı reineleri aqqında hatırlatıp, olarğa qoltutqanını köstermek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
