Rusiye işğal etken Qırımda 117 insan «qırımlı musulmanlarnıñ davaları» boyunca taqip etile, mabüsler Rusiyede yasaqlanğan, amma çoqusı memlekette faaliyet köstergen «Hizb ut-Tahrir» halqara islâm siyasiy teşkilâtınen alâqaları bar olğanında qabaatlana. Bu malümatnı yanvarniñ 27-nde Qırımtatar resurs merkezi aydınlata.
Olarnıñ malümatına köre, taqip etilgen 117 insandan 114-ü tamır qırımtatar halqınıñ vekili ola. 82-si Rusiye apishanesi ve koloniyalarında, 28-zi SİZOda, 2-si ev apsinde buluna, 5-i azat etildi.
«Bu «davalarda» qabaatlavlar «gizli şaatlarnıñ» malümatına ve Rusiye FSBsinen faal işbirligi yapqan «ekspertlerniñ» hulâsalarına esaslana. Yekâne «delil» tintüv vaqtında tapılğan islâm edebiyatı, FSB malümatı ve mabüslerniñ din ve siyaset mevzularında olğan subetleri qayd etilgen sesler ola», – dep bildire Qırımtatar resurs merkezi.
Qırımtatar resurs merkezi qayd etkenine köre, «Rusiye Federatsiyasınıñ bu siyaseti işğal etilgen Qırımda farqlı fikirlernen, diniy ve siyasiy fikri olğan insanlarnen küreş numayışı ola».
«Rusiye Federatsiyası siyasiy maqsadları, hususan qırımtatarlarnıñ zorbalıqsız küreşini ve olarnıñ Qırım işğaline qarşı narazılığını bastırmaq içün qanunlarını qanunsız bir şekilde qullana. Bundan ğayrı, işğalciler «Hizb ut-Tahrir davasınıñ» mabüslerine qarşı repressiyalarnı quvetleştirip, apis müddetleriin 19 yılğa qadar arttıra, ilk yıllarını apishanelerde keçirmege üküm ete, siyasiy mabüslerni cedvellerge ala», – dep qoştı QRM.
Şu sebepten Qırımtatar resurs merkezi «Hizb ut-Tahrir davası» mabüsleriniñ bütün ükümlerini lâğu etmege ve diger siyasiy mabüslerni azat etmege talap ete.
«Qırımtatar resurs merkezi Qırımda siyasiy taqiplerniñ toqtatılması içün halqara toplulıqnı Rusiye Federatsiyasına qarşı basqını quvetleştirmesine, vaqtınca işğal etilgen Qırımda insan aqlarınıñ bozuluvından mesüliyetli olğan şahıslarğa qarşı sanktsiyalar kirsetmesine çağıra», – dep bildirdi Qırımtatar resurs merkezi.
Qırımtatar resurs merkeziniñ malümatına köre, Rusiye Qırım yarımadasını işğal etkeninden berli 370 siyasiy sebepli cinaiy dava qayd etildi, 228-i qırımtatarlarğa qarşı. Ukrayina Yuqarı Radanıñ vekâletlisi Dmıtro Lubinets bildirgenine köre, al-azırda 218 qırımlı siyasiy ve diniy sebeplerden taqip etile.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
