«Kreml parasına diplomatiya». Qırım Türkiye ile bağlarını kene pekitmege tırışa

AQMESCİT – Qırımnıñ Rusiye akimiyeti halqara bağlarnı quruv ıntıluvlarından vazgeçmey. Yaltanıñ Rusiye memuriyeti bu yönelişte pek faal. Bu faaliyet bir neticege ketirecekmi, Qırım.Aqiqat qırımlı cemaat erbaplarından soramağa qarar berdi.

Oktâbrniñ soñunda Yaltanıñ Rusiye memuriyet vekilleri Türkiyeni ziyaret etti. Rusiye memuriyetiniñ yolbaşçısı Yanina Pavlenko ve şeer şurasınıñ yolbaşçısı Konstantin Şimanovskiy Türkiye ziyaretleri neticesinde yerli memurlarnen işbirligi yapmağa planlaştıralar, dep bildirgen ediler.

Noyabr ayında ise Yanina Pavlenko «Yaltada «Türkiyedeki Qırım dostları» halqara birliginiñ reisi Unver Sel yolbaşçılığında Türkiye eyyetini qabul ete», dep bildirdi.

«İstanbulnıñ eñ güzel belediyelerinden biri Beylikdüzünen işbirligi ve şeer qardaşlığına azırlanamız», – dep bildirdi Pavlenko.

Qırımtatar Milliy Meclisiniñ reisi Refat Çubarov böyle bağlarnı takbih etip, «Qırımda Rusiye işğalciler tamır qırımtatar halqına qarşı repressiya ve taqiplerni quvetleştirgende nezaketli Türkiye memurları vaqtınca işğal etilgen Qırımdan Rusiye cinayetçilerini odalarında qabul ete», dep qayd etti.

Onıñ bildirgenine köre, «Birleşken şeerler ve yerli akimiyetler» teşkilâtınıñ Dünya şurası vaqtında Rusiye ilhaq etken Yaltanı bu teşkilâtqa qabul etmege qarar alındı.

Noyabrniñ 16-nda Yaltanıñ Rusiye akimiyeti «qırımtatarlarnıñ çeteldeki semetdeşlerinen bağlarnı inkişaf etmesine bağışlanğan halqara tögerek masanıñ toplaşuvını» keçirdi.

«Qırımtatarlarnıñ çeteldeki semetdeşlerinen bağları» halqara tögerek masası kibi tedbirler sayesinde Rusiye Qırımında yaşayış kerçekleri tarqatıla», – dep bildirdi Unver Sel.

Unver Sel «Cuma Cami açılışında Türkiye de iştirak etecek», dep ayttı.

Qırım.Aqiqat bildirgenine köre, Unver Sel işğal etilgen Qırımğa çoq bardı ve Rusiyege qoltutqanınen belli. 2021 senesi Aqmescitte «Zemaneviy halqara alanda Qırım» konferentsiyasında iştirak etken edi. O vaqıt özüni Türkiye qırımtatar medeniy cemiyetleri federatsiyasınıñ yolbaşçısı olaraq tanıtqan edi.

Qırımtatar Milliy Meclisiniñ azası Gayana Yüksel Qırım.Aqiqatqa izaat berip, Selniñ Türkiyede yaşağan qırımtatarlar adından bir şey aytmağa aqqı yoq, dep aytqan edi.

Yaltalı cemaatçı Ragim Gumbatov Qırım.Aqiqatqa fikrini aytıp, «Qırım ve Türkiye toplulığı arasında eyi munasebetler Ukrayına vaqtında (Qırım işğalinden evel – QA) qurulıp başlanğan edi», amma soñra bozuldı, dep bildirdi.

«Bir qaç Qırım şeeri Türkiye şeerlerinen qardaşlıq bağlarını qurğan edi, munasebetler inkişaf ete, ziyaretler yapılğan edi. Hatırlatmaq kerek ki, 2004 senesi Aqyarda 1854-56 seneleri Qırım cenkinde elâk olğan Türkiye askerlerine abide tiklengen edi. Amma 2014 senesinden soñ bu abide bir qaç kene vandallarnıñ ücümine oğradı. 2015 senesi, Türkiyede Rusiye uçağı tüşürilgen soñ, Sergey Aksenov Qırım şeerleri Türkiye şeerlerinen qardaşlıq bağlarını üze, dep bildirdi», – dep ayttı cemaatçı.

Gumbatov qayd etkenine köre, «Türkiye – demokratik memleket, bir qaç büyük şeerinde muhalifet vekilleri yolbaşçılıq ete».

«Memlekette «baş firqa ve ükümetten» tış areket etken çeşit qurulışlar bar. Bundan ğayrı, Rusiye tarafı bu cebede «diplomatiya muvafaqiyetini» temin etmek içün çoq ğayret köstere ve para sarf ete. Qırımlılarnıñ şahsiy bağlarını da qullana. Qayd etmek kerek ki, maña Qırımnıñ çetel bağlarını qurmağa teklif etilgen edi. Şunıñ içün Qırımnıñ çetelnen işbirligi qurğanı şaşırtmay», – dep qayd etti cemaatçı.

Qırımtatar Milliy Qurultayı Teftiş komissiyasınıñ reisi Ali Özenbaş Qırım.Aqiqatqa izaat berip, Rusiye akimiyetiniñ böyle teşebbüsleri keçken yılları da oldı, amma neticesi olmadı.

«2019 senesi Qırımda iqtisadiyat forumı keçirilecek, yarımadada Türkiye biznesiniñ imkânları muzakere etilecek, dep haber etilgen edi. Körgenimiz kibi, olmadı. Bugün em siyasiy, em iqtisadiy vaziyet daa zor ve biznes içün telükeler daa çoq, leyhalar yerine ketirilecek ve atta bar dep aytmağa kerekmey», – dep izaatladı vaziyetni cemaatçı.

«Qırımnıñ reintegratsiya birligi» cemaat teşkilâtınıñ eksperti Olesâ Tsıbulko Qırım.Aqiqatqa Qırımda Rusiye akimiyetiniñ bütün halqara faalligi «ortaqlarnıñ cümert maliye etilüvine» esaslana, dep tarif etti.

«Sahte «halqara qurulışlarda» qırımlı işbirlikçilerniñ iştiraki çoqusı alda «birlikler» istilâcınıñ parasına ve Rusiye propagandasından ğayrı kimsege belli olmağanda ve meraqlı olmağanda ola. Cinayetçi «Yalta memuriyetiniñ» rolüni añlatmaq mümkün, Yanina Pavlenko dos-doğru Kremlden kontrol etile, Qırımnıñ Cenübiy yalıdaki «topraq ve mulk» meselelerinde de», – dep paylaştı fikrini ekspert.

Türkiye prezidenti Recep Tayyip Erdoğan Ukrayına prezidenti Volodımır Zelenskıynen körüşip, Ukrayına topraq bütünligine qoltutqanını bildirgen edi.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.