Link açıqlığı

Saatnıñ esas haberi

Qırımda 2021 senesiniñ soñunda 116 kişi siyasiy sebeplerden apishanede tutula edi – aq qorçalayıcılar


Vladimir Çekrıgin
Vladimir Çekrıgin

2021 senesiniñ soñuna qadar eñ az 116 kişi işğal etilgen Qırımda siyasiy ya da diniy esaslı sebeplerden apiste tutula.

Bu aqta Qırım aq qorçalayıcı gruppasınıñ idare yolbaşçısınıñ muavini Vladimir Çekrıgin matbuat konferentsiyası vaqtında bildirdi.

«2021 senesiniñ soñuna qadar Qırımdaki cinaiy davalar boyunca 116 kişi siyasiy ya da diniy esaslı sebeplerden azatlıqtan marum etildi ve apiste tutula. Daa 9 insan ev apsinde buluna, 4 kişi taqip etile ve siyasiy sebeplerden azatlıqtan marum etildi. Umumen 2021 senesi siyasiy esaslı şahıslarğa qarşı 21 üküm çıqarıldı, Qırımnıñ 61 sakininen bağlı 170 qararnı qayd ettik. Bu qararlar nezaret altında tutuv ya da nezaret altında tutuvnı uzatuvnen bağlı edi», – dedi Çekrıgin.

Onıñ qayd etkenine köre, eñ büyük mabüsler gruppası qırımtatarlardan ibaret, olar «Qırım musulmanları davasınıñ» mabüsleri ola – al-azırda 79 insan bar.

Ukraina prezidenti Volodımır Zelenskıy Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.

Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.

Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Rusiye insan aqları vekâletlisi Tatyana Moskalkova Qırımda «milletlerara ve dinlerara barışıq» bar ve tamır halqqa yardım kösterile, dep aytqan edi.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG