Kyivde Qırım aq qorçalayıcı gruppasınıñ vekilleri 2021 senesiniñ Qırımdaki insan aqları bozuvlarınıñ taqrizini taqdim ete.
Matbuat konferentsiyasında aq qorçalayıcılar «tutuv vaqtında zorbalıq, işkence ve Rusiye FSBsi ve İç işler nazirliginiñ cezasız qalğanı, keçken yılnıñ siyasiy mabüsler içün aqibetleri, din kütkenlerni taqip etüv sisteması, yañı söz serbestligi ve fikir bildirüv sıñırlavları, jurnalistlerniñ işini sıñırlav, barışıq aktsiyalarğa yol bermemek içün Rusiye qanunlarını qullanuv» aqqında tarif etecekler.
Matbuat konferentsiyasında «Qırım aq qorçalayıcı gruppası» aq qorçalayıcılarınıñ iştiraki ilân etildi.
Ukraina prezidenti Volodımır Zelenskıy Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.
Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Rusiye insan aqları vekâletlisi Tatyana Moskalkova Qırımda «milletlerara ve dinlerara barışıq» bar ve tamır halqqa yardım kösterile, dep aytqan edi.
