«Qırım ğayesi» cemaat teşebbüsiniñ faalleri ve aq qorçalayıcıları «yarımadanıñ vatandaş cemiyeti adından «Qırım platforması» iştirakçilerine muracaat azırladı. Bu aqta teşebbüsniñ Facebook saifesinde aytıla.
«Qırım platforması» muntazam halqara vaqia olsun dep, bütün ğayret köstermek kerek. İşğal etilgen topraqta insan aqlarınıñ bozuluvı yılda bir kün medeniy dünya diqqatınıñ esas meselesi olmalı», – dep aytıla muracaatta.
Muracaat müellifleriniñ fikirince, «iş neticeleriniñ er yıllıq halqara imtianından evel işğal etilgen topraqlarnıñ reintegratsiyasınen bağlı meselelernen alâqası olğan Ukraina akimiyetiniñ organları daa semereli çalışacaq».
«Qırım ğayesiniñ» vekilleri «Qırım platformasınıñ» iştirakçilerini «Qırım platforması» çerçivesinde ilerideki tedbirler içün çezüv leyhalarını azırlaycaq ve işğal etilgen Qırımnen bağlı meseleler boyunca diger halqara institutlar içün tevsiye azırlaycaq daimiy iş organını quruv meselesini baqmalarına çağırdı.
«Birinciden siyasiy mabüslernen, hırsızlanğan insanlarnen ve söz serbestliginen bağlı meselelernen bağlı», – dep aytıla haberde.
Avgustnıñ 9-nda Ukraina prezidenti Volodımır Zelenskıynıñ matbuat kâtibi Sergey Nikiforov Almaniya kantsleri Angela Merkel mezkür sammit arfesinde, avgustnıñ 22-nde Kyivge kelecek, dep ayttı.
Almaniya tarafı bu malümatnı resmiy şekilde daa izaatlamadı.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
