İşğal altındaki Qırımda qırımlılarnı Rusiye arbiy obyektlerinde patlavlarnıñ aqibetlerini çıqarğanı içün taqip ete. Büyük Onlardaki patlavlardan soñ eki qırımlı afu soramağa mecbur oldı. Rusiye saifeleri «Ukrayına istihbaratınıñ casusı» yaqalandı, dep bildirdi. Onı Qırımdaki Rusiye aviabazasında patlavlarnıñ koordinatsiyasını yapqanında qabaatladılar. Bular kim Qırım.Aqiqat bildi.

Büyük Onlar qasabasında Rusiye kontrol etken aviabazada iyülniñ 22-nde patlavlar oldı. Dron ücümi neticesinde silâ anbarında patlavlar oldı, dep bildirdi Qırımnıñ Rusiye yolbaşçısı Sergey Aksenov.

Patlav sesleri 30 kilometr radiusta bulunğan qomşu köylerde eşitildi. Büyük Onlarda yerli sakinler küçlü tumannı kördi. Şaatlar videolarnı paylaştı. Ertesi künü eki qasaba sakini bu sebepten zorluqlarnen qarşılaştı.

Patlav ve «tam kollaps»

Büyük Onlardaki eski sovet arbiy uçaq alanı daa keçken asırnıñ 1990-larında baqılmay qaldı. Amma Ukrayınağa qarşı tam istilâ başlamazdan evel Rusiye onı kene büyük lager olaraq qullanıp başladı, anda arbiyler, tehnika ve, büyük ihtimalnen, qara ordu silâsını yerleştirgen, dep bildire Defense Express portalı.

Aviabazada olğan patlavdan soñ Rusiye akimiyeti zarar olmadı, dep bildirdi. Amma buña inanmaq imkânsızdır. Büyük Onlar soqaqlarında Rusiye arbiy yük maşinaları pek faal oldı, evlerden biriniñ damı zarar kördi.

«Patlav sesleri bütün Qırımda eşitile. Qırım köprü kene qapatıldı. İnsanlar beş kilometr radiusta tahliye etile! Qırım demiryolu çalışmay! Tam kollaps», – dep yaza video müellifi.

Büyük Onlardaki patlavlarnıñ aqibetlerinen video peyda olğan soñ Qırımnıñ Rusiye yolbaşçısınıñ mesleatçısı Oleg Krüçkov müelliflerini «duşmanğa hızmet etkenlerinde» qabaatlap, Rusiye İç işler nazirligine ve FSBge haber etmege çağırdı.

Birinci «tövbeler»

Ertesi künü Rusiye saifeleri Qırımda Büyük Onlardaki aviabazanı ve Rusiye arbiy tehnikasını videoğa çıqarğanlar tutuldı, dep bildirdi.

«Krımskiy Smerş» Telegram kanalı Büyük Onlardaki patlavlarnıñ aqibetlerini videoğa çıqaruv içün açıq afularnı tarqattı. Bu saife kefeli Rusiye tarafdarı bloger Aleksandr Talipovğa aittir. O, Rusiyeniñ Ukrayınağa qarşı büyük istilâsına qoltuta ve Rusiye mahsu hızmetlerine cenkke qarşı çıqqan qırımlılarnı tapıp taqip etmege yardım ete.

Videodaki erkeklerden biri – 42 yaşında Sergey Tarasenko – «patlavdan soñ yanğınnı çıqarğanı» içün afu soray. İçtimaiy ağdaki saifesiniñ malümatına köre, o, Büyük Onlarda yaşay, evli. Başqa açıq bir malümat yoq.

«Krımskiy smerş» saifesindeki videoda ekinci kişi «Büyük Onlarda tahliye avtobuslarını çıqarğanı ve arbiylernen video yapqanı içün» afu soray. Qırım.Aqiqat elde etken malümatqa köre, bu Büyük Onlarda yaşağan 34 yaşındaVitaliy Lopatko ola.

İçtimaiy ağlardaki saifelerinde özüni agronom dep tanıta. Fotoresimlerde bekçi urbasında tura. Vitaliy Lopatko Rusiye bayraqları, Lenin ve Putinnen foto paylaşa.

Qırım.Aqiqat Sergey Tarasenko ve Viktor Lopatkonen bağlanıp olamadı. Bu videolarınen bağlı fikirlerini aydınlatmağa azırmız. Öz isteginen afu soradılarmı, tam belli degil. Rusiye saifelerinde böyle videolar muntazam sürette peyda ola. Bazıları afu metinlerini Rusiye uquq qoruyıcıları yaza ve qorquzuv ve işkencelernen seslendirmege mecbur ete.

«Esas agent» qabaatlımı?

Qırımnıñ Rusiye yolbaşçısı Büyük Onlardaki cermay bazasında yanğın sebebi dronlarnıñ ücümi ola, dep ayttı.

Ukrayına Silâlı quvetleriniñ Strategik bağlar idaresi memleketniñ mudafaa quvetleri iyülniñ 22-nde Büyük Onlardaki Rusiye aviabazasına qarşı ücüm ile bağlı olğanını tasdıqladı.

«Ukrayına Mudafaa quvetleri işğal etilgen Büyük Onlarda (Qırımnıñ Qurman rayonı) Rusiye cermay bazası ve ordu anbarlarını yoq etti», – dep bildirdi müessise.

Rusiye saifelerinde Büyük Onlardaki Rusiye aviabazasına qarşı ücüm mesüliyeti 36 yaşında kefeli Roman Melniçukqa yüklene. «SHOT» Rusiye Telegram kanalı onı Qırımdaki «Ukrayına Mudafaa nazirligi Baş istihbarat idaresiniñ esas agenti» dep adlandıra. Bu malümatnı Rusiye akimiyeti kontrol etken kütleviy haber vastaları faal sürette tarqata.

Ukrayına Mudafaa nazirliginiñ Baş istihbarat idaresi bunı açıq-açıq izaatlamay.

Rusiye menbalarında Roman Melniçuk deñiz flotunıñ motorcısı dep adlandırıla ve Qırımda olğan bir sıra adisege «munasebeti olğanı isbatlandı», dep bildirile. Qırımlı iyulniñ 12-nde Kefede bloger Aleksandr Talipovğa suiqastnı teşkil etkeninde ve 2022 senesi sentâbr ayında Köktebelde Rusiye tele alıp barıcısı Dmitriy Kiselevni arabalarnı yaqqanında qabaatladı.

Rusiye saifeleriniñ malümatına köre, Roman Melniçuk iyünniñ 27-nde İslâm Terek rayonında demiryolda patlavlarğa, iyünniñ 21-nde Kefede ve Aqmescit rayonınıñ Çistenkoye köyünde mayısnıñ 18-nde olğan patlavlarğa alâqası bar eken.

Rusiyeniñ resmiy müessiseleri şimdilik bu aqta bir şey bildirmedi.

Bu adiseler Qırımda farqlı vaqıtlarda oldı. Birinde – Çistenkoye köyünde demiryolnı patlatuvda – FSB sport ustazı Kirill Barannikni qabaatladı. O, uquq qoruyıcılar onı işkencege oğratıp, qabaatını tanımağa mecbur etti, dep ayta.

Diger adiselerde qabaatlılar resmiy şekilde daa aytılmadı.

Roman Melniçuk aqqında aman-aman bir malümat yoq. İçtimaiy ağlarda Kefede yaşay, sport ve motoqoşularınen meraqlana, dep yaza. Qırım.Aqiqat qırımlınıñ fikrini aydınlatmağa azır.

MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.