Qırım işğaline tirenüv kününde Kyivde Ukrayina prezidentiniñ Qırım Muhtar Cumhuriyetindeki temsilciligi, «Qırım platforması» ofisi, Ukrayina Tış işler nazirligi tarafından teşkil etilgen «Cenkniñ 11 yılı. Başlanğıç noqtası: Qırım» forumı keçirile.
Forum açılışında Ukrayina Yuqarı Radasınıñ spikeri Ruslan Stefançuk, Ukrayina Tış işler naziriniñ muavini Öleksandr Mişçenko, Ukrayina prezidentiniñ Qırım Muhtar Cumhuriyetindeki daimiy vekili Olğa Kurışko, Qırımtatar Milliy Meclisiniñ reisi Refat Çubarov, Avropa parlamentiniñ deputatı, Ukrayina meseleleri daimiy maruzacısı, «Avropa halq firqası» fraktsiyasınıñ halqara meseleler koordinatorı Mihael Galler ve Avropa parlamentiniñ prezident muavini Pina Peçerno iştirak etkenler.
Stefançuk yapqan çıqışı vaqtında Rusiyeniñ Ukrayinağa qarşı istilâsı 2014 senesi Qırımdan başlandı, dep hatırlattı. O, repressiyalarğa oğrağan qırımlılar aqqında hatırlatıp, Qırım tirenüvi bugünge qadar devam ete, dep qayd etti. O, Ukrayinanıñ halqara ortaqlarını Ukrayinağa kösterilgen yardımnı eksiltmemege ve «duşmanğa (Qırım – QA) işğalini tasdıqlamağa imkân bermemege» çağırdı.
Oleksandr Mışçenko halqara ortaqlarğa muracaat etip, «Ukrayinanıñ ğalebesini tezleştirmege» çağırdı ve Ukrayina «bir vaqıt Qırımdan vazgeçmeycek», dep bildirdi.
«Qırım – printsipler küreşidir. Rusiye Avropada Ekinci cian cenki vaqtından eñ büyük zapt etüv cenkini Qırımdan başladı. Ve er şey Qırımnen bitmeli», – dep bildirid Mışçenko.
Olğa Kurışko forum sanasından al-azırda Qırımda rusiyeliler eñ az 221 insannı taqip ete, dep bildirdi. Aytılğanlar arasında Qırım.Aqiqatnıñ serbest hadimi (Azatlıq Radiosınıñ leyhası) Vladıslav Yesıpenko bar, Rusiye uquq qoruyıcıları onı 2021 senesi mart ayında apiske aldı. O, içtimaiy ve ekologik meselelerni aydınlata, qırımlılarnıñ soravlarını keçire edi.
«İşğalde olğan insanlarğa muracaat etmege isteyim – boysunmağanıñıznı bilemiz, beklegeniñizni bilemiz ve biz qaytacaqmız. Siznen ğururlanamız», – dedi Kurışko.
Refat Çubarov forumda Qırımtatar Milliy Meclisi adından çıqışta bulunıp, «Rusiye işğal etilgen Qırım meselesini çezilgen olaraq kün tertibine qoymağa tırışsa da», Qırım halqara kün tertibinde qalmalı, dep ayttı.
«Kim teklif etse etsin, amma Ukrayinadan cenk bitmesiniñ şartı olaraq topraqlarından vazgeçmesi talap etilse, bu uzlaşuvlar Ukrayina cemiyeti ve akimiyeti tarafından red etilmeli… Bunıñnen beraber, halqara ortaqlarımızğa, hususan Amerika Birleşken Devletlerine muracaat etip, Ukrayinada barışıq ıntıluvlarında Ukrayina halqınıñ iştiraki ve razılığını almağa çağıramız, Qırımnıñ keleceginen bağlı meselelerde ise tamır qırımtatar halqınıñ iştiraki ve razılığı olmalı», – dedi Çubarov.
Mihael Galler ve Pina Peçerno qırımlılarnıñ, hususan qırımtatarlarnıñ Rusiye tarafından taqip etilüvini takbih etip, avropalı ortaqlar Qırımnıñ işğalden azat etilüvini tezleştirmek içün çalışa, dep işandırğanlar.
Qırım işğaline tirenüv künü –fevralniñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüviniñ esas tedbirlerinden biri oldı.
2020 senesi Ukrayina prezidenti öz buyruğınen fevralniñ 26-nı Qırım Muhtar Cumhuriyeti ve Aqyar şeeriniñ işğaline tirenüv kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
