Qırımda Rusiye uquq qoruyıcıları «Qırım» gazetasınıñ baş muarriri Bekir Mamutov ve «Qırım» gazetasınıñ tesisçisi Seyran İbragimovnıñ evlerinde tintüv keçirdi, dep haber etile «Qırım birdemligi» cemaat birleşmesiniñ Facebook saifesinde.
Berilgen malümatqa köre, şahsiy evleri baqılğan soñ Rusiye polisiniñ hadimleri gazeta muarririyetine yol aldı. Advokat Edem Semedlâyev uquqiy yardım kösterilüvi içün muarririyetke alınmadı.
Jurnalistler Rusiyeniñ Ekstremizm ile küreş merkeziniñ binasına ketirildi.
«Qırım» gazetasınıñ baş muarriri eki memuriy maddege istinaden qabaatlana – Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmı (Rusiye ordusını «itibardan tüşürüv») ve Rusiye Federatsiyası Memuriy uquq bozuvları kodeksiniñ 13.15 maddesi (Sahte haberlerni cemaat içün müim olğan malümat olaraq berüv). Protokol tizilgen son Bekir Mamutov Rusiye Ekstremizm ile küreş merkezinden yiberildi.
«Qırım» gazetasınıñ tesisçisi Seyran İbragimovnı Rusiye uquq qoruyıcıları maşinağa mindirip, Rusiye Federatsiyası İç işler nazirligi binasından belli olmağan yerge alıp ketti.
«Qırım» gazetası 1989 senesi iyül ayından berli qırımtatar tilinde çıqa ve qırımtatarlar Qırımğa qaytqan soñ ana tilinde çıqqan ilk neşirlerden biri ola.
Qırımtatar resurs merkeziniñ malümatına köre, 2024 senesiniñ ilk üç ayı devamında Rusiye uquq qoruyıcıları Qırımda 33 tintüv keçirdi, 28-i qırımtatarlarnıñ evinde oldı. Bundan ğayrı, 41 insan tutuldı, 46 kişi sorğuğa çekildi, Rusiye uquq qoruyıcıları 43 insannen sorav ve «subet» keçirdi.
Qırımtatar resurs merkezi bildirgenine köre, bugünki künde 194 qırımlı siyasiy mabüs bar, 134-ü qırımtatarı ola.
Ukrayına prezidentiniñ Qırım Muhtar Cumhuriyetindeki temsilciligi bildirgenine köre, 2024 senesi fevralniñ 19-nda Rusiye 208 qırımlı mabüsni apiste tuta, 125-i – qırımtatarıdır.
ZMINA İnsan aqları Merkeziniñ leyha reberi Viktoriya Nesterenko bildirgenine köre, 2022 ve 2023 seneleri Rusiye tarafından işğal etilgen Qırımda jurnalistlerge qarşı 162 basqı adisesi qayd etildi.
Nesterenko qayd etti ki, statistikada cinaiy taqipler, jurnalistlerniñ qaçırılması, memuriy protokollar, tintüvler ve İnternette qorquzuvlar bar. Onıñ fikrine köre, al-azırda Qırımda «erkin jurnalistika ve söz serbestligi içün yer qalmadı».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
