Mayısnıñ 11-nde Qırımda Rusiye FSBsiniñ hadimleri tarafından öldürilgen Özbekistan vatandaşı Nabi (Ayub) Rahimovnıñ naaşını 46 künden berli advokatlarğa bermeyler. Bu aqta öldürilgenniñ ömür arqadaşı Sohiba Burhanovanıñ advokatı Edem Semedlâyev Qırım.Aqiqat mühbirine bildirdi.
«Tahqiqat komitetine şikâyet bergen soñ, bizge mahkeme-tibbiy ekspertiza daa keçirile, şunıñ içün naaş berilmey, dep cevap bergenler. Biz naaşnı berüvde bozuvlar bar olğanını tüşünemiz. Zenaatdaşlarımıznen laf ettik, tecribege köre, böyle mahkeme-tibbiy ekspertizalar 2-3 künde bite. Rusiye Federatsiyasınıñ qanunında, ne yazıq ki, bir müddet yazılmay, amma aqılğa yatqan bir müddet olmalı. Bir buçuq ay degil», – dedi imayeci.
Onıñ aytqanına köre, islâm dinine köre, ölü eñ tez vaqıtta defin etilmeli, amma Rahimovnıñ naaşı 46 künden berli berilmey.
Advokatlar bir qaç müessisege şikâyet berdi: Nabi Rahimovnıñ naaşı ne içün berilmegenini bilmek içün Qırımnıñ Rusiye prokuraturası ve Qırımdaki Tahqiqat komitetiniñ idare reberligine muracaat etildi.
Advokat Semedlâyev yaqında öldürilgen Rahimovnıñ apayını Rusiyeniñ Krasnodar ülkesindeki çetel vatandaşlarını vaqtınca tutuv merkezinde ziyaret etti.
«Sohiba tibbiy blokta buluna, çünki qadınlardan tek o qaldı, er kes çıqarıldı. Şaraitler bir qarar. Lâkin şimdilik laf etmesi içün cep telefonını bermeyler. Ve ne içündir aş pişirmege bermeyler, çünki anda bütün şaraitler bar. O, berilgen aşlarnı aşamağa mecbur, aş sıq-sıq islâm normalarına uyğun degil. Bundan ğayrı, odasında eki kamera bar. Sesni qayd etelermi bilmeyim, amma onı kesen-kes közeteler», – dedi Semedlâyev.
Onıñ aytqanına köre, şimdi Sohiba Burhanova Avropa insan aqları mahkemesiniñ ekstraditsiyasınen bağlı qararını bekley.
«Bu tez bir esnas degil, eñ beteri olsa, bu merkezde bir-eki yıl qalır. Bu, ebet, eñ yaramay variant. Onıñ anda bulunğanını şikâyet etecekmiz. Amma şimdilik bu merkezde bulunacaq», – dep añlattı Semedlâyev.
Mahkeme Burhanovanıñ imayesi bergen muracaatnı qanaatlendirmeyip, onıñ Krasnodar ülkesinden video konferentsiya vastasınen mahkeme oturışuvında iştirak etmesine izin bermedi.
Bir kün ögüne berilgen malümatqa köre, Avropa insan aqları mahkemesi, mahkeme reglamentiniñ 39-ıncı qaidesine köre, Qırımda tintüv vaqtında öldürilgen Özbekistan vatandaşı Nabi Rahimovnıñ ömür arqadaşı Özbekistan vatandaşı Sohiba Burhanovanen bağlı qarar çıqardı. Avropa insan aqları mahkemesiniñ qararına köre, mahkeme Burhanovanı Özbekistanğa quvuv qararını qabul etip olamaz.
Daa evel belli olğanına köre, Sohiba Burhanova çetel vatandaşı ya da vatandaşlıqsız şahıs tarafından Rusiyege kiriş qaidelerini ya da bulunuv rejimini bozğanında (Rusiye Memuriy bozuv kodeksiniñ 18.8 maddesiniñ 1.1 qısmı) qabaatlana.
Hatırlatamız, mayısnıñ 11-nde İçki rayonınıñ Yanış Taqıl (Zavetnoye) köyünde tintüvden soñ Nabi Rahimovnıñ ömür arqadaşı Sohiba Burhanova ve 15 yaşında oğulları Taqyuddinni tapıp olamağan ediler. Faaller, qadınnı İçki rayonındaki Rusiye İç işler nazirliginiñ migratsiya meseleleri bölügine alıp ketkenler, dep bildirgen edi.
Mayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi.
Daa soñra «Qırım birdemligi» cemaat birleşmesi Aqmescit civarındaki Dubki köyünde daa bir tintüv başlandı, dep bildirdi. Anda İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgen Ayub Rahimov buluna, dep tahmin etilgen edi.
Qırım ve Aqyardaki Rusiye Tahqiqat komitetiniñ idaresi «uquq qoruyıcı organları hadimleriniñ ayatına qast etkeninden» şübheli sayılğan 49 yaşında Aqmescit sakinine qarşı cinaiy dava açıldı, dep bildirdi. Müessise, erkek «operativ vazifede» olğan FSB hadimlerine qarşı ateş açtı, dep bildirdi.
Şübheliniñ adı ve soyadı, adiseniñ tafsilâtları Tahqiqat komiteti tarafından aydınlatılmay.
Qırım Muhtar Cumhuriyeti ve Aqyar prokuraturası, Özbekistan vatandaşı Ayub (Nabi) Rahimovnıñ Aqmescit civarındaki Dubki köyünde öldürilüviniñ tafsilâtlarını bilmek içün «kerekli tedbirler» alına, dep bildirdi.
