Qırımda üç künden berli bir künde qayd etilgen COVID-19 hastalarınıñ sayısında rekord ilân etile – iyülniñ 16-nda saba 394 yañı koronavirus hastası qayd etildi, dep haber ete Qırımnıñ Rusiye yolbaşçısı Sergey Aksenov.
«281 hasta tibbiy yardım içün muracaat etkende qayd etildi, 107 kişi daa evel qayd etilgen hastalarnen alâqada oldı, altı hasta çetelden keldi. Bir künde 225 insan yahşı oldı, bütün müddet devamında 46 800 kişi tüzeldi», – dep bildirdi Aksenov.
Qırımnıñ Rusiye sağlıq nazirliginiñ malümatına köre, bir künde yedi insan koronavirustan vefat etti, pandemiya vaqtında 1631 kişi keçindi.
Hatırlatamız, Qırımda bir kün evelsi 381 yañı koronavirus hastası, iyülniñ 13-nde ise 375 COVID-19 hastası aqqında haber etildi.
Qırımnıñ Rusiye sağlıq naziri Aleksandr Ostapenko koronavirus yuqunçı ile küreş ştabınıñ toplaşuvında Qırımda COVID-19 diagnozınen hastahanege alınğan hastalarnıñ sayısı 70% arttı, dep bildirdi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, keçken afta koronavirus yuqunçından vefat sayısında antirekord qayd etildi. Qırımda esasen ind ştammı tarqala.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
