Link açıqlığı

Saatnıñ esas haberi

Qırımda yañı COVID-19 hastalarınıñ sayısı artmağa devam ete – akimiyet


Qırımda iyünniñ 24-nde 232 koronavirus hastası qayd etildi

Qırımda iyünniñ 24-nde 232 koronavirus hastası qayd etildi, dep bildirdi iyünniñ 25-nde saba Qırımnıñ Rusiye yolbaşçısı Sergey Aksenov. Bir kün ögüne Qırımda 221 hasta qayd etildi.

«192 hasta tibbiy yardım içün muracaat etkende qayd etildi, 31 kişi daa evel qayd etilgen hastalarnen alâqada oldı, 9 hasta çetelden keldi. Bir künde 142 insan yahşı oldı, bütün müddet devamında 42 775 kişi tüzeldi», – dep bildirdi o, içtimaiy ağlarda.

Qırımnıñ Rusiye sağlıq nazirliginiñ malümatına köre, pandemiya vaqtında 1475 insan vefat etti.

«855 insan (COVID) ambulator tedaviylevde buluna, 2162 kişi (COVID ve pnevmoniya) hastahanede yata. Umumen pandemiya vaqtında 47029 COVID-19 hastası qayd etildi», – dep aytıla iyünniñ 25-nde müessise haberinde.

İyünniñ 23-nde Qırımnıñ Rusiye sağlıq naziri Aleksandr Ostapenko qırımlılarnı Rusiyeniñ COVID-19 aşılarınen vaktsinatsiya planınıñ 31%-ı yerine ketirildi, dep bildirdi.

Keçken afta Aleksandr Ostapenko qırımlılarnı Rusiyeniñ COVID-19 aşılarınen vaktsinatsiya planınıñ tek 29%-ı yerine ketirildi, dep bildirgen edi.

Ostapenkonıñ daa evel qayd etkenine köre, Qırımda ağır koronavirus ve hastahaneden tış pnevmoniya hastalarınıñ sayısı artmağa devam ete. Sağlıq naziri Qırımnıñ hastahanelerinde COVID-19 ile küreşmek içün daa 500 yer açılacaq, dep bildirdi.

Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.

COVID-19 koronavirus yuqunçı

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG