Qırımda keçken künü, iyünniñ 23-nde, 221 yañı koronavirus hastası qayd etildi, dep bildirdi Kreml kontrolindeki Qırım yolbaşçısı Sergey Aksenov.
«116 hasta tibbiy yardım içün muracaat etkende qayd etildi, 100 kişi daa evel qayd etilgen hastalarnen alâqada oldı, 5 hasta çetelden keldi», – dep yazdı Aksenov Facebook saifesinde.
Onıñ malümatına köre, bir künde tüzelgenlerniñ sayısı 190 oldı, bütün müddet devamında 42 633 kişi yahşı oldı.
Qırımnıñ Rusiye sağlıq naziri Aleksandr Ostapenko Qırımda ağır koronavirus ve pnevmoniya hastalarınıñ sayısı artmağa devam ete, dep bildirdi. Onıñ aytqanına köre, Qırımda COVID-19 ile küreşmek içün daa 500 yer açılacaq.
Qırım ve Aqyardaki Rospotrebnadzor idaresiniñ yolbaşçı muavini Dmitriy Krutikov Qırımda yañı koronavirus hastalarınıñ sayısı keçken afta 40% arttı, dep bildirgen edi.
Bundan evel Aksenov yañı koronavirus sıñırlavlarını kirsetip, eski tedbirlerni 2021 senesi sentâbrniñ 1-ne qadar uzattı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
