Qırımda sentâbrniñ 1-ne qadar eglence müessiseleri ve cemaat aşağan yerler içün koronavirus sıñırlavları kirsetile, mezuniyet aqşamlarınıñ keçirilüvi yasaqlana ve hızmet saalarınıñ vekilleri mecburiy sürette aşı olmalı.
Yarımadada koronavirus pandemiyası sebebinden yüksek seviyeli azırlıq buyruğına iyünniñ 22-nde Kreml kontrolindeki Qırım yolbaşçısı Sergey Aksenov deñişmeler kirsetti.
Vesiqağa köre, sentâbrniñ 1-ne qadar:
- ratlıq ve bayram künleri eglence merkezleri ve diger eglence müessiseleriniñ, hususan bala raatlıq ve eglence teşkilâtlarınıñ işi yasaqlana;
- saat 23.00-dan 08:00-ğa qadar cemaat aşağan müessiselerniñ işi yasaqlana, sımarış berip almaq mümkün. Kinoteatrlerde ticaret hızmetleri yasaqlana, alış-veriş-eglence komplekslerinde eglence tedbirleriniñ keçirilüvi yasaqlana;
- Aqmescit, Aqmescit rayonı, Yalta ve Aluştada diskoteka ve mezuniyet aqşamlarınıñ keçirilüvi yasaqlana;
- teatr ve kinoteatrlerde zallarnıñ 50%-dan çoq bilet satışı yasaqlana.
Bundan ğayrı, şifahane-kurort tedaviylevi, balalarnıñ raatlığı ve sağlamlaştırıluvı, cemaat aşaması, kezinti hızmetleri, naqliyat hızmetlerinde çalışqanlar koronavirus aşısını yapmağa mecbur.
«Şifahane-kurort tedaviylevi, balalarnıñ raatlığı ve sağlamlaştırıluvı, cemaat aşaması, kezinti hızmetleri, naqliyat hızmetlerinde çalışqan teşkilât, müessiselerniñ reberlerine hadimlerni (tibbiy ceetten aşı olmamaq içün bir sebep olmasa) yañı koronavirus yuqunçına qarşı aşılandırmağa tevsiye etile», – dep aytıla vesiqada.
Hatırlatamız, Qırımda koronavirus sıñırlavları mayısnıñ 28-nden iyülniñ 1-ne qadar uzatılğan edi.
İyünniñ 16-nda Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yarımadada koronavirus hastalarınıñ sayısı artqanı içün COVID-19 aşılarını mecburiy şekilde yaptırmağa teklif etti.
Hatırlatamız, keçken künü Qırımda 201 yañı COVID-19 hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
