Qırımda keçken künü 201 yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov.
«160 hasta tibbiy yardım içün muracaat etkende qayd etildi, 39 kişi daa evel qayd etilgen hastalarnen alâqada oldı. Bir künde tüzelgenlerniñ sayısı 38 insan oldı, bütün müddet devamında 42 318 insan yahşı oldı», – dep aytıla haberde.
Keçken künü beş hasta vefat etti, umumen pandemiya vaqtında 1455 hasta keçindi, dep aytıla Qırımnıñ Rusiye sağlıq nazirliginiñ er künlik monitoringinde.
Hatırlatamız, iyünniñ 20-nde «Artek» bala lageriniñ matbuat hızmeti «bir-eki koronavirus hastası» olğanını tasdıqladı, faqat tam hasta sayısı aydınlatılmay. Daa soñra lager reberligi qayd etilgen 12 COVID-19 hastası aqqında bildirdi. İyünniñ 21-ne qadar «Artekte» daa 60 mektep talebesi ve 12 yetekçi observatorğa alındı. Bala lageriniñ vekilleri bildirgenine köre, hastalar «Artekke» Rusiyeden keldi.
İyünniñ 21-nde Qırımda 193 yañı COVID-19 hastası qayd etildi.
İyünniñ 16-nda Qırım ve Aqyardaki Rospotrebnadzor idaresiniñ yolbaşçı muavini Dmitriy Krutikov er aftalıq brifing vaqtında soñki afta Qırımda koronavirus hastalarınıñ sayısı 16% arttı, dep bildirdi. Eñ çoq hasta Yaltada qayd etildi, soñki üç aftada yañı COVID-19 hastalarınıñ sayısı 74% oldı.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yarımadada koronavirus hastalarınıñ sayısı artqanı içün COVID-19 aşılarını mecburiy şekilde yaptırmağa teklif etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
