2025 senesi aprel ayına qadar eñ az 92 Ukrayina vatandaşı işğal etilgen Qırımda «diversiya azırlav» ve «casuslıq» qabaatlavları boyunca apiste yata. Bu aqta Qırım aq qorçalayıcı gruppası (QAQG) haber ete.
Olarnıñ arasında – 2014 senesinden başlap Qırımda tutulğanlar ve 2022 senesi fevralniñ 24-nden soñ Zaporijjâ ya da Herson vilâyetlerinde hırsızlanıp Qırım SİZOlarına çıqarılğan eñ az 33 kişi.
«Böyle davalarda Rusiye FSBsi insanlarnı «diversiya azırlav», «silâ saqlav» ve «casuslıqta» qabaatlay. Bu davalarda qanunsız tahqiqat usulları, işkence ve malümat almaq içün maneviy basqı, qabaatsızlıq prezumptsiyasınıñ bozuluvı, Rusiye FSBsiniñ Rusiye kütleviy haber vastalarında «şaatlıq» videolarını tarqatuvı qayd etile», – dep aytıla haberde.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
