Qırım ve Aqyarda soñki künde COVID-19 hastalarınıñ sayısı 1500-ni aştı, tünevinki raqamlardan daa yüksek oldı. Bu aqta yarımadanıñ Rusiye ükümet saytları haber ete.
Qırımda 887 yañı koronavirus hastası qayd etildi, 163 hasta hastahanege alındı. Bir künde 280 insan tüzeldi. 5 kişi vefat etti.
Aqyarda 658 yañı COVID-19 hastası qayd etildi, 70 insan hastahanege alındı. 98 hasta hastahaneden çıqarıldı. 44 yaşından 88 yaşına qadar 6 kişi vefat etti.
Bir kün evelsi yarımadada 1373 yañı COVID-19 hastası qayd etildi.
Qırım ve Aqyarnıñ Rusiye akimiyeti ilk «omikron» variantlı hastalar qayd etildi, dep tasdıqladı. Qırımda hastalar içün qoşma yerler açıldı. Aqyarda sıñırlav tedbirleri kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
