Rusiye Tahqiqat komiteti Moskvada qazağa oğrağan uçaqta bulunğan 78 insandan tek 37-si sağ qaldı, dep bildirdi. Bu aqta Rusiye Tahqiqat komitetiniñ saytında haber etile.
«Daa evel haber etilgeni kibi, Moskva-Murmansk seferini kerçekleştirgen uçaqta 78 insan, şu cümleden ekipaj azaları bar edi. Tahqiqatnıñ elde etken malümatına köre, olardan 37-si sağ qaldı», – dep aytıla haberde.
Tahqiqat komiteti bildirgenine köre, tahqiqatçılar zarar körgen, şaat, ava limanı ve ava şirketiniñ hadimleri ve uçaqnı işletüvden mesüliyetli diger şahıslarnı sorğuğa çekip başladı.
«Kerekli tehnik vesiqalar baqılacaq. Tahqiqat qazanıñ çeşit versiyalarını baqa. Qazanıñ sebeplerinen bağlı soñki neticeler tahqiqat alğan malümat er taraflama teşkerilgen soñ çıqarılacaq», – dep qayd etti Tahqiqat komiteti.
Daa evel haber etilgeni kibi, mayısnıñ 5-nde Moskvadaki «Şeremetyevo» ava limanında «Aeroflot» Rusiye ava şirketiniñ «Suhoy Superjet» yolcu uçağında çıqqan yanğın neticesinde elâk olğanlarnıñ sayısı 13 insanğa arttı.
Rusiye Tahqiqat komiteti tek bir insan elâk olğanını tasdıqlağan edi. Haber agentlikleriniñ menbaları ve diger kütleviy haber vastaları zarar körgenlerniñ farqlı sayılarını bildire. Rusiye Fevqulâde vaziyetler nazirliginiñ malümatına köre, 6 insan hastahanege alındı.
Uçaqta 78 insan, şu cümleden 5 ekipaj azası bar edi.
Uçaq qaza sebebinden qondı. O, SU-1492 Moskva-Murmansk ava seferini kerçekleştire edi, faqat aman-aman birden «Şeremetyevo» ava limanına qayttı. Berilgen malümatqa köre, uçaqta yanğın çıqtı (TASS haber agentliginiñ menbası yaşın aqqında ayta), diger malümatqa köre – yanğın qaza qonuvı sebebinden çıqtı. Yanğınnıñ kerçek sebepleri daa belli degil. Cinaiy dava açıldı, felâket sebeplerini tedqiq etmek içün komissiya quruldı.
«Suhoy Superjet» – Rusiyeniñ qısqa mesafeli yolcu uçağı, Sovetler Birligi dağılğan soñ Rusiyede işlep çıqarılğan ilk yolcu uçağıdır. 2011 senesinden itibaren bir qaç memleketniñ (esasen – Rusiyeniñ) ava şirketleri tarafından qullanıla. SU-1492 felâketi – bu tür uçaqlarnıñ yedinci qazasıdır.
Bundan evelki SSJ-100 qazası 2012 senesi İndoneziyada oldı, o vaqıt 45 insan elâk olğan edi.
