Rusiye Tahqiqat komiteti Moskvanıñ «Şeremetyevo» ava limanında «Aeroflot» Rusiye ava şirketiniñ «Suhoy Supercet» yolcu uçağında çıqqan yanğın neticesinde bir insan elâk olğanını tasdıqladı. Daa dört yaralanğan kişi aqqında haber etile.
Haber agentlikleriniñ menbaları ve diger kütleviy haber vastaları elâk olğanlarnıñ farqlı sayısını – 1-den 12-ge qadar – bildire. Rusiye Fevqulâde vaziyetler nazirliginiñ malümatına köre, 6 insan hastahanege alındı, dep bildire Azatlıq Radiosınıñ rus hızmeti.
Uçaqta qonğanda yana edi. O, SU-1492 Moskva-Murmansk ava seferini kerçekleştire edi, faqat aman-aman birden «Şeremetyevo» ava limanına qayttı. Berilgen malümatqa köre, uçaqta yanğın çıqtı (TASS haber agentliginiñ menbası yaşın aqqında ayta), diger malümatqa köre – yanğın qaza qonuvı sebebinden çıqtı. Yanğınnıñ kerçek sebepleri daa belli degil.
Baza telegram-kanalınıñ derc etken videosında körüngeni kibi, uçaq qonğanda onı alev qavrap alğan edi. İçtimaiy ağlarda şaatlarnıñ foto ve videoları peyda oldı, anda yolcular yanğan uçaqnı terk ete.
Yanğın söndürildi. Uçaqnıñ quyruq qısmı aman-aman bütünley yandı.
