Qırımnıñ rusiyeli akimiyeti yarımada mekteplerinden qavğa çıqarğan 10-uncı sınıf talebeleri içün tarih dersligini qaytarıp aldı. Uquq qoruyıcılarnıñ fikrince, kitapta “qırımtatar halqına nefret doğurğan” fikirler isbatlanğan,
Bu aqta Tasil naziri Natalya Gonçarovağa esaslanıp RİA Novosti bildire.
Onıñ aytqanına köre, derslikni ileri taqdirini iş gruppası belgilecek, amma onıñ terkibi daa tasdıqlanmadı.
“Ne yapacağımıznı tüşünecemiz: o metin qısımlarına tekliflermi ya da başqadan yazuvımı olacaq qararını iş gruppası alacaq”, - dep qayd etti Gonçarova.
Qırımtatar Milliy Meclis reisi Refat Çubarov, ilhaq etilgen yarımadanıñ mekteplerinde tarqatılğan onuncı sınıf talebeleri içün “Qırım tarihi” rusiye dersligi, Ukraina Cinaiy Kodeksiniñ ameline oğray, dep bildirdi.
Çubarovnıñ aytqanına köre, bu derslik nümüneleri Ukraina uquq qoruyıcı organlarına berilgen muracaatlarğa qoşulacaq, ve “Qırımda işğal siyasetiniñ numayışını etmek içün” çeşit-türlü halqara meydanlarında kösterilecek.
Daa evel Qırımlı adliyeci, sanat ve tasil hadimleri, Qırımnıñ Rusiye tasil nazirligine muracaat etip, 10-uncı sınıflar içün S. V. Yürçenko muarririyetinde çıqqan «Qırım tarihı» dersligini mündericesinde qırımtatarlar aqqında bulunğan provokatsion ibareler sebebinden onı qullanuvdan çıqarmağa rica etti. Kitapta "tatar ealisiniñ ekseriyeti almanlarğa yahşı yanaşqan, çoqusı faal sürette yardım etken edi" dep yazılğan.
Qırım Tasil nazirliginiñ vekilleri adiseni şimdilik izaatlamadı.
