Qırımtatar faalleri cumaaqşamı künü, iyünniñ 13-nde, mart ayında Qırımda kütleviy tintüvler neticesinde tutulğan ve qomşu Rusiyege çıqarılğan Mecit Abdurahmanovnıñ ailesine kelip, ev qurmağa yardım etti. Abdurahmanovnıñ qorantası vagonçıqta yaşay. Bu aqta «Qırım birdemligi» cemaat birleşmesi Qırım.Aqiqatqa bildirdi.
Faaller qurucılıq malzemelerini ketirip, bir qaç saat devamında ev qurdılar. Olar cuma künü, iyünniñ 14-nde, kene kelip çalışmağa niyetlene.
«Halqımıznıñ bir ananesi bar – hayırseverlik. 90-ıncı yılları pek tarqalğan edi. Halq Qırımğa kelgende er kes biri-birine yardım etken edi. Bir-birine qoltuta ediler… Soñki vaqıtları bu anane zayıfladı, onı yañıdan başlatmaq kerekmiz. Biz, musulmanlar, çette qalmamaq kerekmiz, dindaşlarımızğa qıyın vaziyette yardım etmek kerekmiz», – dep ayttı faallerden biri Emin Aliyev.
Mecit Abdurahmanov apiske alınğanda ömür arqadaşı Elmira Abdurahmanova 9 aylıq yüklü edi. Aprelniñ 29-nda qızı doğdı – Sulbiye.
Ömür arqadaşı - SİZOda, halq - yanında. Tevqif etilgen qırımtatar faaliniñ qızını loqsahaneden nasıl qarşılay ediler (süret toplamı)
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 insan tutuldı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
