Rusiye kontrolindeki Qarasuvbazar rayon mahkemesi cemaat faali İrfan Bekirovnı mahkeme oturışuvına çağırğan celpname yolladı.
Bu aqta «Qırım birdemligi» cemaat birleşmesi yanvarniñ 11-nde haber ete.
Bekirovnıñ qayd etkenine köre, uquq qoruyıcı organları hadimleriniñ fikirince, 2020 senesi noyabrniñ 3-nde o, Rusiye Memuriy bozuv kodeksiniñ 20.6.1 maddesini (fevqulâde vaziyette ve onıñ peyda oluv telükesi olğanda areket qaidelerine riayet etmeme) bozdı.
Memuriy dava yanvarniñ 19-nda baqılacaq.
«Qırımtatarlarğa – Qurmandaki «Hizb ut-Tahrir davası»boyunca apiske alınğan musulmanlarğa qol tutmağa keldim. Bu apis cezaları ve yamâmlıq ükümlerini maqbul körmeyim. Celpnameni aytsaq, bu memuriy davanı balalarnı qoruv aktsiyasına qoşulğanım içün maña yapılğan basqı dep sayam», – dep qayd etti faal.
2020 senesi noyabrniñ 3-nde faal İrfan Bekirov Rusiye kontrolindeki Qırım arbiy garnizon mahkemesiniñ binası ögünde tutuldı. O, büyük apis cezalarına üküm etilgen siyasiy mabüsler Arsen Abhairov, Rustem Emiruseinov ve Eskender Abdulganiyevge qol tutuv aktsiyasına qoşuldı.
Advokatlar Rustem Kâmilev ve Ayder Azamatovnıñ bildirgenine köre, o künü uquq qoruyıcı organlarınıñ hadimleri «Qırım birdemliginiñ» eki mühbiri ve faal İrfan Bekirovğa qarşı tizgen memuriy protokollar politsiyağa protsessual bozuvlar sebebinden qaytarıldı.
Hatırlatamız, tahminen 200 qırımtatarı Qırımdaki mahkeme binası ögüne kelip, 2020 senesi noyabrniñ 3-nde Rusiyeniñ Rostov-na-Donu mahkemesinde qabaatlayıcı ükümleri çıqarılğan Qurmandaki «Hizb ut-Tahrir davası» mabüslerine qoltuttı. Bu dava mabüslerine umumen 42 yıl apis cezası berildi.
«Facebookta çaldır ve yaz». Qurmandaki «Hizb ut-Tahrir davası» mabüsleriniñ esnası (fotoresimler)
Aqmescitteki mahkeme binası ögüne kelgen üç faal politsiya tarafından tutuldı. Olar bir qaç maddege istinaden qabaatlana: Rusiye Memuriy bozuv kodeksiniñ 20.2.1 maddesi («Kütleviy tedbir teşkilâtçısı tarafından toplaşuv, miting, numayış, yürüş ya da narazılıq aktsiyasını keçirüv nizamınıñ bozuluvı»), Rusiye Memuriy bozuv kodeksiniñ 20.2.5 maddesi («Kütleviy tedbir teşkilâtçısı tarafından toplaşuv, miting, numayış, yürüş ya da narazılıq aktsiyasını keçirüv nizamınıñ bozuluvı») ve Rusiye Memuriy bozuv kodeksiniñ 20.6.1 maddesi («Fevqulâde vaziyette ya da onıñ telükesi olğanda areket qaidelerine riayet etmeme»).
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
