«Facebookta çaldır ve yaz» – Rustem Emiruseinovnıñ azatlıqta aytqan soñki sözleridir. O, apayı Aliyeden evlerinde tintüv başlağanını böyle haber etmesini rica etken edi. Onı 2019 senesi fevralniñ 14-nde SİZOğa alıp ketkenler, onıñnen beraber Qurman rayonınıñ eki sakini Arsen Abhairov ve Eskender Abdulganiyev bar edi. 2020 senesi noyabrniñ 3-nde üç qırımtatarı Rusiyeniñ Rostov-na-Donu şeerindeki Cenübiy okrugınıñ arbiy mahkemesi binasında umumen 42 yıl apis cezasını aldı.
Faal, jurnalist, aq qorçalayıcılar olarnıñ esnasını Qurmandaki «Hizb ut-Tahrir davası» dep adlandıra. Rusiye tahqiqatı ve prokuraturası olarnı terrorizmde qabaatlay. Yarımada işğalinden soñ bu dava altıncı Qırımdaki «Hizb ut-Tahrir» davası oldı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
Qırım.Aqiqat Qurmandaki «Hizb ut-Tahrir davası» mabüsleriniñ ikâyelerini fotoresimler vastasınen tarif ete.
Facebook Forum