Qırım Muhtar Cumhuriyetiniñ prokuraturası, mahkemeniñ «Yedinaya Rossiya» firqası ve «Avtokanal Sevastopolâ» teşkilâtınıñ azası İgor Kuçerâvıyge qarşı cinaiy davanı qapatmaq qararını izaatladı. Müessiseniñ qayd etkenine köre, aqyarlı qabaatını tolusınen tanıdı.
«Kuçerâvıynı aytsaq, qabaatını tolusınen tanıdı. Faqat mahkeme oturışuvında imaye tarafı mesüliyetke çeküv müddeti yekünlengeni içün azat etmege rica etti. Neticede mahkeme advokatnıñ muracaatını qanaatlendirdi», – dep bildirdi prokuraturanıñ matbuat hızmeti Qırım.Aqiqatqa.
Kuçerâvıynıñ advokatı İgor Mokinniñ yanvarniñ 28-nde Qırım.Aqiqatqa bildirgenine köre, müvekkili Hersonda buluna. İşğal etilgen Qırımğa qaytmağa niyeti barmı bilmey.
Yanvarniñ 27-nde «Jurnalist tahqiqatları merkezi» haber agentliginiñ «Mahkeme malümatı bürosı» mahsus leyhası, Kyivniñ Dnepr rayon mahkemesi İgor Kuçerâvıyge qarşı davanı qapattı, dep bildirdi.
Onıñ Qırım ve Herson vilâyetiniñ memuriy sıñırında Ukraina telükesizlik hızmetiniñ hadimleri tarafından yaqalanması aqqında 2019 senesi dekabrniñ 3-nde belli oldı. Ertesi künü UTH, er adam Ukraina pasportını almaq içün esas Ukrainağa ketti, dep bildirdi.
2019 senesi dekabrniñ 6-nda UTH ve Qırım Muhtar Cumhuriyetiniñ Prokuraturası Kuçerâvıyge Ukraina Ceza kodeksiniñ 110 maddesiniñ 1-inci qısmına (Ukraina topraq bütünligi ve toqunılmazlığına qast etüv) istinaden şübheli sayılğanını bildirdiler. 2019 senesi dekabrniñ 10-nda Herson şeer mahkemesi İgor Kuçerâvıynı 60 künge ev apsine aldı.
İgor Kuçerâvıy «Yedinaya Rossiya» firqasınıñ ilkingi bölüginiñ kâtibi ola, ilhaq etilgen Aqyarda «Yedinaya Rossiya» firqasınıñ regional bölükniñ siyasiy şura erkânına kirmekte.
