Kyivniñ Dnepr rayon mahkemesi «Yedinaya Rossiya» firqasınıñ ve «Avtokanal Sevastopolâ» teşkilâtınıñ azası İgor Kuçerâvıyge qarşı davanı qapattı. Qırım Muhtar Cumhuriyetiniñ prokuraturası bu malümatnı Qırım.Aqiqatqa tasdıqladı.
«Jurnalist tahqiqatları merkezi» haber agentliginiñ «Mahkeme malümatı bürosı» mahsus leyhasınıñ bildirgenine köre, dava cinaiy mesüliyetke çekmek içün müddet bitkeninden qapatıldı.
Qırım.Aqiqat, tafsilâtlı malümat almaq içün Küçerâvıynıñ advokatınen bağlanmağa ırışa.
2019 senesi dekabrniñ 10-nda Herson şeer mahkemesi İgor Kuçerâvıynı 60 künge ev apsine aldı. Onıñ Qırım ve Herson vilâyetiniñ memuriy sıñırında Ukraina telükesizlik hızmetiniñ hadimleri tarafından yaqalanması aqqında 2019 senesi dekabrniñ 3-nde belli oldı. Ertesi künü UTH, er adam Ukraina pasportını almaq içün esas Ukrainağa ketti, dep bildirdi.
2019 senesi dekabrniñ 6-nda UTH ve Qırım Muhtar Cumhuriyetiniñ Prokuraturası Kuçerâvıyge Ukraina Ceza kodeksiniñ 110 maddesiniñ 1-inci qısmına (Ukraina topraq bütünligi ve toqunılmazlığına qast etüv) istinaden şübheli sayılğanını bildirdiler.
İgor Kuçerâvıy «Yedinaya Rossiya» firqasınıñ ilkingi bölüginiñ kâtibi ola, ilhaq etilgen Aqyarda «Yedinaya Rossiya» firqasınıñ regional bölükniñ siyasiy şura erkânına kirmekte.
