Özüni Avropada Qırımtatar diasporasını birleştirici olaraq köstergen Qırım teşkilâtları assambleyası Birleşken Milletler Teşkilâtınıñ Baş kâtibi Antoniu Guterrişniñ Rusiye jurnalistine Qırım ealisiniñ öz taqdirini tayin etüv prinsipi aqqında bergen cevabına öz beyanatını yolladı.
Vesiqada qayd etile ki, Qırımlar (Qırımtatarlar) Qırımnıñ tamır halqı olaraq "Ukrayinanıñ suvereniteti ve topraq bütünligine qol tuta, 2014 senesi qanunsız referendumnı ve Qırımnıñ Rusiye tarafından ilhaqına ıntıluvını tanımay".
Aynı zamanda, Assambleya qayd ete ki, öz muqadderatını tayin etüv prinsipi manipulâsiya qullanılğanını red etüv, Qırım tamır halqınıñ halqara seviyede tanılğan öz muqadderatını tayin etüv aqqını red etüv demek degil.
"Söz Qırımtatarlarnıñ iç öz muqadderatını tayin etüv ve mustaqil Ukrayina terkibinde milliy-territorial muhtariyetni meydanğa ketirüv aqqı aqqındadır", — dep aytıla beyanatta.
Qayd etile ki, işğalden azat etüv ve Qırımnıñ kelecegine er angi halqara yanaşuvlar "Qırımlılarnıñ (Qırımtatarlarnıñ) tamır halqı statusı, olarnıñ kollektiv iradesi ve qanuniy temsil organlarını" köz ögüne alıp şekillendirilmeli.
"Assambleya şunı qayd etmek kerek dep saya ki, Qırımdaki vaziyetni muzakere etüv, hususan halqara kontekstte, Qırımnıñ tamır halqı — Qırımlarnıñ (Qırımtatarlarnıñ) statusını, olarnıñ kollektiv iradesini ve halqara uquq normalarına köre öz-özüni belgilev aqqını köz ögüne almazdan tolu degildir. Qırım teşkilâtları assambleyası qayd ete ki, Rusiye istilâsını tanımamaq ve öz muqadderatını tayin etüv prinsipini qullanuv Qırım tamır halqınıñ mustaqil Ukrayinada öz muqadderatını tayin etüv qanuniy aqqını körmemezlikke urmaq kerekmey", —dep qayd etile beyanatta.
Qara qış ayınıñ 29-nda Rusiye tış işler naziri Sergey Lavrov, Rusiye BMT-ge Donbas ve Qırım ealisiniñ öz taqdirini belgilemek aqqını tanımaq ricasınen muracaat etti, dep bildirdi.