Rusiye Qırımnı ilhaq etkeninden berli 126 insan "Hizb ut-Tahrir" teşkilâtına alâqası bar olğanında qabaatlanıp, "Qırım musulmanları davası"nıñ mabüsleri oldı, olardan 118 kişi apishanede ve ev apsinde tutula, dep bildire Qırımtatar Resurs Merkezi (QMC).
Olarnıñ malümatına köre, al-azırda 82 insan Rusiye apishanelerinde ve koloniyalarında tutula, 31 kişi SİZO-da, 2 kişi ev apsinde buluna. Daa eki kişi sağlıqları içün azat etildi, amma soñra tekrar apiske alındı. Mahküm etilgenlerden biri Rusiye esirliginde elâk oldı, 8 kişi ise Rusiye mahkemeleri tarafından tayin etilgen apis cezalarını tolusınen çekti.
QRM yazğanına köre, bu "davalar" boyunca qabaatlavlar "gizli şaatlarnıñ" ifadelerine ve Rusiye FSBsi ile faal işbirlikte bulunğan "ekspertlerniñ" hulâsalarına esaslana. Qırımtatar Resurs Merkezi qayd ete ki, "delil" olaraq tintüvler vaqtında tapılğan yasaq etilgen islâm edebiyatı, FSB-nıñ operativ malümatı ve mahkümlerniñ diniy ve siyasiy mevzularda munaqaşaları qayd etilgen audio yazılar qullanıla. Faallerni Rusiyede yasaq etilgen "Hizb ut-Tahrir" teşkilâtınıñ faaliyetine alâqası bar olğanında qabaatlaylar.
"Qayd etmek kerek ki, bu vaqıtqa qadar "Hizb ut-Tahrir" davasınıñ iç bir mabüsi deñişim çerçivesinde azat etilmedi. Bu insanlar qanunsız cezalarnı çekmege mecburlar, amma olarnıñ cinaiy davanen iç bir alâqası yoq. Böylece, umumen 25 siyasiy mabüs qanunsız ceza müddetini ttolusınen çekti, olardan 8-i - "Hizb ut-Tahrir" davasınıñ mabüsleri", — dep yaza QMC.
Qırımtatar resurs merkezinde, Rusiye "öz qanunlarını siyasiy maqsatlarda, hususan, qırımtatarlarnıñ zorbalıqsız küreşini ve Qırım işğaline qarşı narazılıqlarını bastırmaq içün qanunsız qullana", dep sayalar.
QRM "Qırım musulmanları davası" mabüsleriniñ bütün ükümlerini lâğu etmekni ve "diger siyasiy mabüslerni acele azat etmekni" talap ete.