Qıtayda yañı koronavirustan 132 insan oldı, hasta olğanlarnıñ sayısı 5974-ke arttı, dep qayd etti Qıtay Halq Cumhuriyeti Milliy sağlıq komissiyası, dep bildire Azatlıq Radiosı.
Soñki kün içinde hasta olğan daa 1459 insan qayd etildi, umumen olarnıñ sayısı 5974 oldı. Koronavirus şübhesi olğan insanlar esapqa alınsa, hastalanğanlarnıñ sayısı 9000-den çoq olması mümkün.
Qıtay tışında koronavirus hastaları daa 15 memlekette, hususan Avstraliya, Almaniya, Vyetnam, Kanada, Malayziya, Singapur, ABD, Tailand, Frenkistan, Cenübiy Koreya ve Yaponiyada qayd etildi.
Yaqında qayd etilgen virus büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
Daa evel Monğolistan ve Qırğızistan Qıtay sıñırını qapattı, dep bildirdi. Özbekistan, Qazahistan ve Turkmenistan sıñırdaki kontrolni quvetleştirdi. Rusiye işğal etken Qırım ve Aqyarda koronavirus telükesi tarqalğanı içün tevsiyeler çıqarıldı.
