Rusiye işğal etken Qırımnıñ qırımtatarlar toplu yaşağan yerlerinde Rusiye quvetçileri sakinlerni alıp, Rusiye ordusına qoşmaq içün seferberlik noqtalarına ketire. Bu aqta sentâbrniñ 22-nde «Qırım ğayesi» vatandaş teşebbüsi bildirdi.
Aq qorçalayıcılarnıñ malümatına köre, qırımtatarlar toplu yaşağan yerlerde seferber etilgenlerniñ sayısı biñge yaqınlaşa ya da biñden çoq oldı.
Qayd etilgenine köre, operatsiya saba 6-da başladı ve hususan qırımtatarlar toplu yaşağan yerlerde keçe – Bağçasaraynıñ 6-ncı ve 7-inci mikrorayonları, Aqmescit civarındaki Mamaq (Stroganovka) köyü, Mamut Sultan (Dobroye) taraflarınıñ köyleri, Sarı-Su, Saq, Qalay, İslâm Terek, Zuya.
Reydlerde polis hadimleri iştirak ete, mesken yerlerniñ kirişlerinde ise Rusiye gvardiyasınen Qırım yol patrul hızmetiniñ noqtaları açıldı.
«Bazı evlerge yalan aytıp kirgenler – yardım kerek, dep qıçırğanlar, insanlar qapu açqanda celpname bergenler. İş yerinden seferber etilgenler bar – Zuyada bir qaç erkek oca celpname aldı, Bağçasarayda – tibbiyet hadimleri. Celpname berilgen soñ insanlarnı avtobusqa mindirip, arbiy komissarlıqqa alıp ketkenleri belli oldı», – dep aytıla haberde.
«Qırım ğayesi» qayd etkenine köre, işğal etilgen topraqlarnıñ sakinlerini işğalci devletniñ ordusına aluv cenk cinayeti ola ve «cinayetlerniñ qurbanı kene Qırımnıñ tamır halqı olğanını» köstere.
«Qırımtatarlarnıñ seferber etilüvi tamır halqnıñ genotsid şekillerinden biri ola bile», – dep bildirdi teşebbüs vekilleri.
Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva Qırımda Rusiye arbiy komissarlıqları qırımtatarlar toplu yaşağan yerlerde celpnamelerni faal sürette bere.
Qırım.Aqiqat muarririyeti bu malümatnı teşkermege tırışa.
Rusiye Federatsiyasınıñ prezidenti Vladimir Putin sentâbrniñ 21-nde memlekette qısmiy seferberlik ilân etilecek, dep bildirdi. Buyruqta tek yedekteki vatandaşlar ve arbiy hızmet körgenler alınacaq, dep aytıla. Başta olar qoşma azırlıq körecek.
Rusiye Mudafaa naziri Sergey Şoygu Rusiye ordusına 300 biñ insan alınacaq, dep bildirdi.
Şoygu bir qaç ayda ilk sefer Ukrayınağa qarşı cenkte ölgen Rusiye askerleriniñ sayısını aydınlattı. Onıñ aytqanına köre, fevralniñ soñundan berli Ukrayınadaki cenkte 5937 insan elâk oldı.
Ukrayına Silâlı quvetleriniñ Baş ştabı sentâbrniñ 21-ne qadar Rusiye ordusı Ukrayınada 55 biñden çoq askerni coydı, dep haber ete.
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
