Rusiyede tevqif etilgen qırımtatar Leniye Umerova Ukrayina prezidenti Volodımır Zelenskıyge muracaat etti. Bunıñ aqqında onıñ ağası Aziz Umerov haber etti.
"Bu mektüpni sizge Lefortovo SİZO-sından bir siyasiy mabüs kibi yazam. Keçken sene qışnıñ başında men Qırımğa hasta babamnı ziyaret etmek içün kete edim, amma RF topraqlarına kirişte meni yaqaladılar. Yarım yıldan soñ ise, mayıs ayında, meni casuslıqta qabaatladılar", - dep yazıla mektüpte.
"Bugünde adamlarımız ağır künlerden keçe, inkişaf ve yaşamaq aqları içün küreşe. Ve epimiz, Ukrayina vatandaşları, er birimiz öz yerinde, elimizde olğan eñ qıymetli şeyni - namusımıznı ve serbestligimizni cesaretle mudafaa etemiz. Evelki nesiller tarafından qoyulğan ve öz tecribemiznen pektilgen bir temel. Er birimiz içün mudafaa etkenimiz temel ihtiyaclar seviyesinde olğan sözler!", - dep yazdı qız.
Aziz Umerov Leniyege mahkeme-psihiatrik ekspertizası tayin etilgenini de bildirdi. Ekspertizanıñ mddeti, usulları ve tarzı ise belli degil.
İyülniñ 1-nde "Qırım uquq qoruyıcı" gruppası" qırımtatar Leniye Umerova RF mahkemesiniñ qararınen daa dört ay tevqifli qalacağını bildirgen edi.
Bıltır dekabr ayında 25 yaşındaki Leniye Umerova Kıyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Ağası Aziz Umerov Qırım.Aqiqatqa izaat berir eken, qardaşı üç ay devamında çetele vatandaşları içün merkezde tutuldı, dep tarif etti. Amma martnıñ 13-nde mahkeme qararınen onı andan azat etip aldılar.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayina vatandaşınıñ apis müddetini 15 künge uzattırdı.
Mayısnıñ 5-nde Moskva Lefortovo mahkemesi qırılı Leniye Umerovanı devlet hainliginde qabaatlap apiske aldı.
Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
