Qırımtatar rejissörı Nariman Aliyevniñ "Evge" filmi, "Oscar" Amerika kino akademiyasınıñ mükâfatına Ukrainanıñ yekâne namzeti oldı. Bunı Oscarnıñ Ukraina komiteti bildirmekte.
"Oscarnıñ Ukraina komiteti, Ukrainadan "Halqara tolu metrlik film" kategoriyasında "Oscar" Amerika kino akademiyasınıñ mükâfatına namzetlerniñ saylavını yekünledi. Bu yıl milliy seçimde bir film iştirak etecek: "Evge", rej. Nariman Aliyev, 96 daqqa", - denile komitet matbuat hızmetiniñ Facebook saifesinde.
Daa evel «Evge» filmi Odesa halqara kinofestivaliniñ Grand Prix mukâfatını aldı. «Evge» filminiñ ukrain premyerası Odesa kinofestivalinde iyülniñ 14-nde oldı. Levha noyabrniñ 7-nde Ukrainada kösterilecektir.
«Evge» levhası qırımtatarı Mustafa aqqında tarif ete. Eki oğlu Qırım işğalinden soñ Kyivge ketti. Büyük oğlu Nazim vefat ete, babası onı Qırımğa alıp, musulman ananelerine köre defin etmek ve küçük oğlu Alimni evge qaytarmaq içün paytahtqa yol ala.
Daa evel qırımtatar rejissöri Nariman Aliyevniñ «Evge» levhası Bükreşteki halqara kinofestivalinde eñ eyi film mukâfatını aldı.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
