Advokat Nikolay Polozov, Rusiye akimiyeti Qırımtatar Milliy Meclisini terrorcı teşkilât kibi tanıy bile ve bu Qırımda yañı kütleviy basqılarğa sebep olacaq, dep farz ete. Bunı Polozov Qırım.Aqiqat Radiosınıñ yaynında ayttı.
«Rusiye akimiyetiniñ daa da ileri ketecegi ve Qırımtatar Milliy Meclisini ekstremist teşkilât kibi tanımaq yerine, onı terrorcı teşkilât kibi tanımağa tırışacağı ile bağlı ciddiy qorqular bar, bu ise qırımtatarlarğa qarşı yañı kütleviy basqılarğa sebep olacaq», – dedi Polozov.
Advokatnıñ sözlerine köre, Rusiye bu adımnı atsa, «milliy özidare organları ile alâqası olğan bütün qırımtatarlar, «Hizb ut-Tahrir davalarında» kibi, yalıñız şaatlarınıñ ifadelerine esaslanıp büyük cezalar alacaq».
Qırımtatar Milliy Meclisi OSCE milliy azlıqlar işleri Yuqarı komissarı Kayrat Abdurahmanovğa qırımtatarlarnıñ taqip etilüvi ve oğratılğan işkenceleri aqqında malümat berdi.
Dört yıl evelsi, 2016 senesi sentâbrniñ 29-nda, Rusiye Yuqarı mahkemesi Kreml kontrolindeki Qırım Yuqarı mahkemesiniñ Qırımtatar Milliy Meclisi yasağı qararını tasdıqladı. Qırımtatarlarnıñ temsiliy organı ekstremist teşkilâtı olaraq tanıldı, resmiy sebep – Rusiye topraq bütünligine qast etüv ve insanlarnı qorquzuv.
Qırımtatar Milliy Meclisi 1991 senesi qırımtatarlar sürgünlik yerlerinden qaytqan soñ quruldı. O, Qırımtatar Milliy Qurultayınıñ icra organı ola. 2017 senesi aprel ayında BM Halqara mahkemesi Ukrainanıñ Rusiyege qarşı davası boyunca temin tedbirleri çerçivesinde Meclis yasağınıñ lâğu etilüvini talap etti, lâkin Moskva onı yerine ketirmedi.
Qırımtatarlarnı tamır halq olaraq tanıma
2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil etmekte. Qırımtatar Milliy Meclisi ve Qurultayı qırımtatarlarnıñ temsiliy organları olaraq tanıldı.
Er yıl avgustnıñ 9-nda dünya tamır halqlar künü qayd etile. Onı BM Baş Assambleyası 1994 senesi tasdıqladı.
