Qırımtatar Milliy Meclisi OSCE milliy azlıqlar işleri Yuqarı komissarı Kayrat Abdurahmanovğa qırımtatarlarnıñ taqip etilüvi ve oğratılğan işkenceleri aqqında malümat berdi, dep bildirdi Meclis reisi Refat Çubarov Facebook saifesinde.
Onıñ bildirgenine köre, laf işğal etilgen Qırımda qırımtatarlarnıñ taqip etilüvi aqqında kete.
«Rusiye işğalcileriniñ tamır qırımtatar halqını ve işğalge razı olmağan etnik ukrainalılarnı taqip etüvi ve zulumğa oğratuvına diqqat ayırıldı. Siyasiy mabüsler vaziyetinen bağlı malümatta yapmağan cinayetlerini iftira etmege mecbur etmek içün Rusiye cezalandırıcılarınıñ qullanğan işkenceleri qayd etildi», – dep ayttı Refat Çubarov.
Daa evel berilgen malümatqa köre, Avropa Şurası Parlament assambleyası «Qırımda tamır halqlarnıñ Rusiye Federatsiyası tarafından siyasiy taqip etilüvi» mevzusında munaqaşa olmaycaq.
Avropa Şurası Parlament assambleyası iyünniñ 23-nde Qırımda qırımtatarlarnıñ aqları aqqında qararnı qabul etti.
Ukraina eyyeti Qırımda insan aqlarınıñ vaziyeti, insanlarnıñ ğayıp oluvı ve yarımadada qanunsız apiske aluvlar, qırımtatarlarnıñ aqlarını qoruv, Rusiyeniñ Qırımtatar Milliy Meclisini «terror teşkilâtı» olaraq tanıma qararınıñ lâğu etilüvinen bağlı meselelerni Avropa Şurası insan aqları komissarı Dunja Mijatović ile muzakere etken edi.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirdi. Rusiye insan aqları vekâletlisi Tatyana Moskalkova Qırımda «milletlerara ve dinlerara barışıq» bar ve tamır halqqa yardım kösterile, dep aytqan edi.
