Qırımtatar bayraq künü yaqınlaşqanınen Aqmescit rayonında qırımtatar faalleri Rusiye prokuraturasından tenbi vesiqalarını alıp başladı. Böyle vesiqa Rolan Osmanovğa da keldi. Onıñ kopiyasını içtimaiy ağlarda paylaştı.
Prokuratura «toplaşuv, miting, numayış, yürüş ve narazızıq aktsiyaları, ekstremist faaliyeti ile küreş qanunları bozulmamalı», dep qayd ete.
«Bu sene tenbi vesiqaları farqlı, keçken yılları başqa ifadeler qullanılğan edi. Bu tenbini siyasiy baqışlarını serbest bildirüvge qarşı maneviy basqı ve milliy aq ve menfaatlarını qoruv ıntıluvına qarşı basqı dep sayam. Amma kimseniñ altın tamğalı milliy bayrağımnı kötermemni yasaq etmege aqqı yoq», – dep qayd etti faal.
Soñki sefer Qırımda qırımtatarlar mayısnıñ 18-i qırımtatar halqı genotsidiniñ qurbanlarını añma künü arfesinde bunıñ kibi tenbiler alğan edi.
Qırım.Aqiqat bildirgenine köre, Donetsk vilâyetinde Qırımtatar bayraq künü munasebetinen balaban bayraq tikildi, ukrainalılar onı Qırımğa yollamağa istedi. Bayraqta birinci tilekni qırımtatarlarnıñ lideri Mustafa Cemilev yazdı.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
