Qırımdaki Rusiye quvetçileri qırımtatar faallerini mayısnıñ 18-i, Qırımtatar halqınıñ sürgünlik qurbanlarını añma künü, arfesinde «qanun bozulmaycaq», dep tenbileyler. Bu aqta qırımtatar faali Nariman Celâl Qırım.Aqiqatqa bildirdi.
«Bizim içün adiy bir şey. Zenaatdaşımız Rustem Mennanov Facebookta alğan ihtarını derc etti… Sabadan bağçasaraylı faaller de telefon etti. Anda üç insanğa qanun bozulmaycağına dair prokuror tenbileri berildi. Beş yıl içinde bir çoq insanğa, maña da, bunıñ kibi vesiqalar berile edi», – dedi Celâl.
O, insan qanunnı bozmasa, bu vesiqanıñ iç bir emiyeti yoq, dep qoştı; bu ihtarlarnıñ maqsadı – insanlarğa «maneviy ceetten tesir etmektir».
«Hatıra künü arfesinde başqa fikirde olğanlarğa Qırımda açıq tedbir keçirmege izin bermeyler, tedbir keçirilmesi içün izin alıp olamaymız. Şu sebepten insanlar bunı sıq-sıq şevqnen yapa», – dedi Celâl.
Qırımtatar faali Zair Smedlâ da bunıñ kibi bir ihtar aldı. Vesiqanıñ kopiyasını Facebookta derc etti.
«Beş yıl devamında matem tedbiri ve bayram künleri arfesinde çeşit türlü tenbiler bermek anane oldı, bu sefer de istisna olmadı. Böyle bir vesiqanı devlet qırımtatar tilinde bermek teklifim qabul etilmedi, Qırım anayasasında yazğanlar, amma amelde yoq!», – dep yazdı Celâl.
Rusiye quvet müessiseleri vaziyetni resmiy şekilde izaatlamadı.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
