Qırımtatar faali, aq qorçalayıcı Lutfiye Zudiyevanıñ imayesi Kreml kontrolindeki Aqmescit Kiyev rayon makhemesiniñ oturışuvı vaqtında faal tutulğanda ve memuriy cinayet aqqında protokol tizilgende uquq qoruyı organlarınıñ «qaba hataları» oldı, dep bildirdi. Bu aqta Qırım.Aqiqat mühbiri haber ete.
Advokat Emil Kurbedinovnıñ qayd etkenine köre, mayısnıñ 30-nda onı Zudiyevağa uquqiy yardım köstermesi içün Rusiye ekstremizm ile küreş merkeziniñ binasına kirsetmey ediler. İmayeci prokuraturağa cinayet, hususan «E» Merkeziniñ hadimleri vekâletlerinden tış areket etkeni aqqında bildirdi.
O, qırımlı tarihçı-siyasetşınas Andrey Nikiforovnıñ ekspert qararında olğan zıddiyetlerge diqqat celp etti. Nikiforov arapça bilmey, şu sebepten ekstremist dep adlandırılğan timsallerdeki yazılarnıñ manasını añlatıp olamaz.
Bundan ğayrı, ekspertniñ qararındaki tedqiqat qısmında Mümine Saliyevanıñ adı keçe, mında ise Lutfiye Zudiyeva qabaatlana.
Advokat Mammet Mambetovnıñ qayd etkenine köre, davada mezkür cinayetten zarar körgenler yoq. Advokat, uquq bozuluvı cemiyet içün zararlı olmasa, qapatılmalı, dep qayd ete.
«E» Merkeziniñ temsilcileri Zudiyevanıñ advokatlarınıñ aytqanlarını izaatlamadı.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı. Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı.
Zudiyevanıñ aytqanına köre, dava malümatlarında qullanıcı Tagir Minibayevniñ 2014 senesi aprel ayında paylaşqan yazısı bar, Zudiyeva anda qayd etile.
Ukraina Tış işler naziri Pavlo Klimkin dünya toplulığını mayısnıñ 30-nda ilhaq etilgen Qırımda tutulğan qırımtatar aq qorçalayıcıları Lutfiye Zudiyeva ve Mümine Saliyevanıñ azat etilüvini talap etmesine çağırdı.
Al-azırda Qırım ve qomşu Rusiyeniñ müessiseleri bir de bir izaat bermediler.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
