Qırımda «separatizmge» açıq çağırğanından eki yılğa şartlı olaraq üküm etilgen Kefe sakini, qırımtatar faal Suleyman Kadırov sınav müddeti bitkeni içün cezadan azat etildi. Bu aqta advokat Aleksey Ladin martnıñ 2-nde Qırım.Aqiqatqa bildirdi.
«Rusiye Ceza kodeksiniñ 73-ünci maddesi esasında 2 yıl sınav müddetinen 2 yıl şartlı apis cezasından azat etildi, 2020 senesi martnıñ 1-nde sınav müddeti bitkeni içün cinaiy-icra inspektsiyasınıñ esabından çıqarıldı», – dep aytıla Aleksey Ladinniñ Qırım.Aqiqatqa bergen vesiqasında.
2018 senesi martnıñ 1-nde mahkeme Kadırovnı «separatizmge» açıq çağırğanında qabaatlap, eki yılğa şartlı olaraq apiske aldı.
2018 senesi mayısnıñ 3-nde qırımtatar faali Suleyman Kadırovnıñ ükmüni deñiştirmedi.
Qabaatlavnıñ versiyasına köre, Kadırov 2016 senesi martında, özüni Aqmescitten bir qırımtatar olaraq tanıtqan ve Ukrainanıñ kontroli altında olmağan Donetsk ve Lugansk vilâyetlerini azat etmek içün «Qırım» batalyonınıñ meydanğa ketirilmesi aqqında bildirgen nasıldır Demyan Demyanenkonıñ videoroligini repost etti.
Bir qaç aydan soñ repostnıñ altında, içinde, cümleden, «Qoltutam, Qırım evelden de, şimdi de ve kelecekte Ukraina olacaq» sözleri olğan Kadırovnıñ izaatı peyda oldı. Oña qarşı Rusiye Cinaiy kodeksiniñ 280.1 maddesi boyunca iş açıldı. Qabaatlav FSB ekspertleri tarafından yapılğan ve Kadırovnıñ izaatında Rusiyeniñ topraq bütünliginiñ bozulmasına davet olğanını isbatlağan ekspertizağa esaslana.
2017 senesiniñ aprelinde Rusiyeniñ maliy monitoringi boyunca hizmeti Kadırovnı ekstremistler ve terroristler cedveline kirsetti.
Kadırov özü, cinaiy işi – öz noqtai-nazarını faal surette ifade etkenine ve aq-uquqnı qorçalav saasındaki faaliyetlerine cevaben mahsus hizmetler tarafından yapılğan provakatsiyadır, dep iddia ete.
