Qırımtatar aq qorçalayıcısı, Yaltadaki «Hizb ut-Tahrir davasınıñ» mabüsi Emir-Usein Kuku Başkortostan Cumhuriyetindeki Salavatnıñ №16 koloniyasına avuştırıldı.
Bu aqta ömür arqadaşı Meryem Kuku advokat Refat Yunusnıñ malümatına esaslanıp «Qırım birdemligine» bildirdi.
«Emir-Usein şimdi karantinde buluna. Advokatnı körgenine pek quvandı ve qorantası, halqı, cemaatına selâm ayttı. Advokat acele bir şey olsa, oña cep telefonı nomerasını qaldırdı», – dep ayttı Meryem Kuku.
Advokatnıñ siyasiy mabüsniñ ömür arqadaşına bildirgenine köre, eki ayda bir kere onı ve diger siyasiy mabüslerni koloniyada ziyaret etmege niyetlene.
Qorantanı Emir-Useinniñ sağlıq vaziyeti ve sistematik tedaviylevniñ olmaması qasevetlendire.
«Emirni Qırımda tutqanda urulğan büyrekleri çoqtan raatsızlay, amma diagnoz daa yoq. Rostov-na-Donuda antibiotik bergenler – ağrı keçmedi. Bundan ğayrı, tiz buğumında bir şey bar. Rostov-na-Donuda, Salavatqa yollamazdan evel, UZİ yapqanlar. İlk netice – Beyker kistası. Bir şey yapmaylar. Tizini ağrıdan zornen bükley. Bunı advokatımız Sergey Loktev daa birinci instantsiya qararına qarşı istinaf oturışuvları olğanda aytqan edi», – dep qoştı mahküm etilgen aq qorçalayıcınıñ ömür arqadaşı.
İyünniñ 25-nde Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
