Qırımtatar caz çalğıcısı Usein Bekirov dünya cazınıñ yıldızı, «Grammy» mukâfatını eki kere alğan Mike Stern ve davulcı Maks Malışevskiy ile yañı eserini taqdim etti.
Bekirovnıñ matbuat hızmeti bildirgenine köre, eserniñ adı – «Eastern Kaleidoscope».
«Usein Bekirov funk, fusion ve ethno-jazz üslüplerinde muzıka yazıp icra ete. Onıñ eserlerinde qırımtatar, ukrain, azeri, ind ve balkan halq nağmeleri yanğıray. «Eastern Kaleidoscope» de istisna olmadı, mında qırımtatar nağmeleri üslübinde caznı eşitecekmiz», – dep aytıla haberde.
Eserniñ çevirip tizgen, em de uruvlı aletlerniñ icracısı Maksim Malışev oldı – Ani Lorak, Asiya Ahat, Aleksandr Ponomarev, Svâtoslav Vakarçuk (Okean Elzı), Jamala, Dmitriy Şurov (Brüssel ve Pianoboy leyhaları) kibi artistlerniñ leyhalarında iştirak etken davulcı.
«Eserniñ yazıluvında efsaneviy caz gitarcısı, «Grammy» mukâfatına altı kere namzet kösterilgen ve eki kere qazanğan Mike Stern (USA) iştiraki Ukraina caz muzıkası içün hususiy bir vaqia oldı. Adı dünyanıñ eñ eyi 75 cedveline kirgen (Down Beat mecmuası, 2009) caz muzıkası saasında eñ büyük dünya mukâfatlarını qazanğan yıldız «Eastern Kaleidoscope» ve bir aydan soñ Usein Bekirovnıñ yañı albomı taqdim etilgende eşitecek yañı eserimizde gitar çaldı», – dep aytıla haberde.
Berilgen malümatqa köre, «Eastern Kaleidoscope» 2021 senesi mayısnıñ soñunda taqdim etilmesi beklenilgen Usein Bekirovnıñ «Hands» yañı albomına kirecek.
Usein Bekirovğa «Ukrainada nam qazanğan artist» unvanı berilgen edi.
Usein Bekirov – etnocaz, ethno fusion, fank ve başqa üslüplerde çalğan qırımtatar caz çalğıcısıdır. Bogdan Gumenük, Dennis Adu, İgor Zakus, Barri Brengard kibi çalğıcılarnen işbirligi yapa. «Ethnovation», «Oakmen» taqımlarınen beraber ve öz caz kvintetinde çala.
1982 senesi fevralniñ 23-nde Özbekistanda doğdı. 1990 senesi qorantası tarihiy Vatatanı Aqmescitke qayttı. Şimdi Usein Bekirov Kyivde yaşay.
