Qırımnıñ advokatlar palatasından 75-ten ziyade adam advokat Edem Semedlâyevge qarşı memuriy davasında istinaf şikâyetini imzaladılar. Bunı "Qırım birdemligi" cemaat birleşmesi haber etti.
"Protokol oña qarşı RF Memuriy uquq bozma qanunnamesiniñ 19.3 maddesine binaen "E" merkeziniñ yolbaşçısınıñ talabı ile soyunıp, çıplaq qalmaqtan red etkeni içün tizilgen edi. Bunıñ içün advokat 4 biñ ruble para cezasını ödemek kerek, evel o aynı madde ile, polis bölüginden audio yazısı yapqanı içün 12 künge tevqif etildi", - dep yazıla bildirmede.
İstinaf şikâyeti Aqmescitteki Qırımnıñ Yuqarı mahkemesine yollandı. Advokatlar Semedlâyevni polis hadiminiñ qanuniy talaplarına boysunmamağanına köre suçlu tanığan qadı Sergey Demenoka şahsında Mereziy Rayon mahkemesiniñ qararına itiraz bildireler.
Noyabrniñ 18-nde Rusiye nazaretinde olğan Qırımnıñ Yuqarı mahkemesi Edem Semedlâyevniñ tevqif etilmesine berilgen istinaf şikâyetini red etti.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
