Qırım.Aqiqat leyhasınıñ beş yıllığına Kyivde “Mıstetskıy Arsenal”da “Ukraina cemiyeti ve Qırım - kelecekke baqış” açıq muzakeresi keçti. Spikerlerniñ birisi ukrain volontör, yırcı, “Antitela” taqımınıñ lideri Taras Topolâ edi. Öz nutqında o Qırım içün informatsion cenk aqqında, cemiyet liderleriniñ fikirleri müimligi ve keçmiş hataları aqqında laf yürsetti. Qırım.Aqiqat çalğıcınıñ esas qaydlarını ayırdı.
Rusiye propagandası
Men çoqtan añladım ki, menim aytqanımnı, noqta-i nazarımnı, bazı maqsatlarımnı insanlar - aseletmi, aselet degilmi - amma taqlit ete. O - meni izlegen, bizim muzıkamıznı diñlegen, videolarımıznı baqqan insanlardır. Ve, elbette ki, cemiyet faaliyetimiz çerçivesinde biz, bir şey etip, adamlarnıñ baqışlarını şekilleymiz.
Rusiye propaganda maşnası, mefküresini tarqatmaq içün cemiyetke belli olğan adamlarnı qullana
Cemiyetke belli adamlar, birinciden, öz fikirleri içün, ifade etken ğayeleri içün cemaat ögünde mesüliyetligini añlamaq kerek. Körünip tura ki, Qırım işğalinden soñ rusiye informatsion cenk ve rusiye propaganda maşnası, mefküresini tarqatmaq içün cemiyetke belli olğan adamlarnı qullana.
Fikir liderleri
Ressamlar, icadiy adamlar, cemiyetke belli olğan insanlar Ukrainanıñ bütünligi tiklenmesi içün informatsion, haber saasında yan-yanaşa turmalı
Cemiyet ve, mıtlaqa, cemiyetke belli olğan adamlar, öz tefsirlerinde daima mıqayt olmalı. Hususan, Qırım ilhaqı, onıñ kelecegi, anda soñki beş yıl devamında olıp keçken vaqialar kibi meselelerde. Men bunı pek yahşı añlayım. Onıñ içün menimce, ressamlar, icadiy adamlar, cemiyetke belli olğan insanlar Ukrainanıñ bütünligi, insan aqları tiklenmesi içün informatsion, haber saasında yan-yanaşa turmalı. Ve mıtlaqa tamır halqnıñ aqlarını közde tutmalı.
Biz uquq esnasında, diplomatik esnasta küçlü degilmiz, amma öz icadımıznen, intervyülerimiznen, açıq areketlerimiznen, Ukraina devleti ketken yönelişni quvetleştirmelimiz.
Ğayıp etilgen vaqıt
Biz Qırımda rusiye medeniy merkezleriniñ küçlü faaliyetini köre edik
Qırım informatsiya alanında ukrain olsun dep, biz, Ukraina Mustaqilligi vaqtında kerçekten de az iş yaptıq. Men öz tecribemden ayta bilem, haber olğan şeylerge esaslanıp - işte, yarımadanıñ medeniy yaşayışı aqqında. Ukrainler iştirak etken medeniy tedbirler pek az edi. Misal içün, “Antitela” taqımı bir qaç tedbirde iştirak etken edi, amma olarnıñ teşkilcileri ukrainler degil edi. Biz Qırımda rusiye medeniy merkezleriniñ küçlü faaliyetini köre edik. Çoqusı alda bu - Rusiyege kerek olğan haberlerniñ yarımadada tarqalması.
Siz bizge işana bilesiñiz
Körünip tura ki, diplomatik yollarından ğayrı, biz halqnı, o topraqnı medeniy-informatsion saasında da qorçalamalımız. Bunı ne etip doğru yapmaq? Menim açıq-aydın cevabım yoq. Amma eminliknen ayta bilem, cemiyetniñ bir qısmı, şu sıradan men de, bunı eñ qısqa müddette kerçekleştirmek içün olduqça areket etecekmiz. Siz bizge işana bilesiñiz.
Malümatname: 2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
